چیئرمین پی سی بی محسن نقوی نے قذافی اسٹیڈیم  کی تعمیر نو کے کام پر ہونے والی پیش  رفت پر اطمینان کا اظہار کیا ہے۔

تفصیلات کے مطابق چیئرمین پی سی بی محسن نقوی نے قذافی اسٹیڈیم کا تفصیلی دورہ کیا اور  تعمیراتی کاموں پر پیش رفت کا جائزہ لیا۔

اس موقع پر چیف آپریٹنگ آفیسر پی سی بی سمیر احمد،ڈائریکٹر انفراسٹرکچر، ایف ڈبلیو او اور نیسپاک کے متعلقہ حکام بھی موجود تھے۔

چیئرمین پی سی  بی محسن نقوی نشستوں کے لئے تعمیرکردہ آخری  اسٹرکچر پر گئے اور گراؤنڈ کے ویو کو دیکھا۔ محسن نقوی نے آخری نشستوں سے گراؤنڈ کے نئے ویو کی تعریف کی۔

محسن نقوی  پویلین کے فلورز پر بھی گئے اور جاری تعمیراتی سرگرمیوں کا مشاہدہ کیا۔

چیئرمین پی سی بی محسن نقوی نے خندق کے دونوں اطراف دیدہ زیب گرل لگانے کی ہدایت کی ۔

انہوں نے میڈیا سے گفتگو کرتے ہوئے کہا کہ  10 اکتوبر کو قذافی سٹیڈیم کی تعمیر نو کے کام کا باقاعدہ آغاز کیا گیا  تھا۔ الحمد اللہ 53 روز میں انتہائی تیزی اور اعلیٰ معیار کے ساتھ کام کیا گیا۔

چیئرمین پی سی بی نے کہا کہ پوری ٹیم جانفشانی سے دن رات کام کر رہی ہے۔ چیمپئنز ٹرافی ٹورنامنٹ سے قبل پراجیکٹ کو مکمل کر لیں گے۔ پورا سٹیڈیم سٹیٹ آف دی آرٹ اور عالمی معیار کا بنایا جا رہا ہے۔ نئے اسٹیڈیم میں تقریبا 34 ہزار شائقین کے  میچ دیکھنے کی گنجائش ہو گی۔

خیال رہے کہ  قذافی اسٹیڈیم کی تعمیر نو کے کام نے  مزید اسپیڈ پکڑ لی ہے۔ صرف 53 روز میں مجموعی طور پر 80 فیصد تعمیراتی کام مکمل ہوچکا ہے۔

مین بلڈنگ کا گرے اسٹرکچر 100 فیصد جبکہ پویلین بلڈنگ کا گرے اسٹرکچر 90 فیصد مکمل ہوگیا ہے۔ انکلوژرز کے تعمیراتی کام 75 فیصد مکمل ہوگئے۔

نشستوں کے لیے اسٹرکچر کی تعمیر  اور خندق کا کام آخری مرحلے میں ہے۔