پاکستان ٹیسٹ ٹیم کے سابق ہیڈ کوچ جیسن گلیسپی نے اچانک کوچنگ سے مستعفی ہونے کی وجوہات بتا دیں۔

آسٹریلین میڈیا کو  دیے گئے ایک انٹریو میں جیسن گلیسپی نے انکشاف کیا ہے کہ ٹم نیلسن کو ان کے اسسٹنٹ کے عہدے سے ہٹانے کا فیصلہ حیران کن تھا جس کی وجہ سے انہوں نے پاکستان کے ٹیسٹ کوچ کے عہدے سے استعفیٰ دے دیا۔

جیسن گلیسپی نے کہا کہ  ٹم نیلسن کو نہ رکھنے کے فیصلے سے مجھے مکمل بے خبر رکھا گیا، نیلسن کے معاملے کے بعد لگا کہ میرا کام اب مشکل ہوگیا ہے، ایک اہم فیصلے سے ہیڈ کوچ کو آگاہ نہ رکھنے نے مجھے ایسا سوچنے پر مجبور کیا۔

انہوں نے کہا کہ ماضی کے چند واقعات کے بعد اس معاملے نے مجھے سوچنے پر مجبور کیا کہ میری ضرورت ہے یا نہیں، میرا پاکستان کی کوچنگ کا جو مقصد تھا وہ فوت ہوتا جا رہا تھا، میرا کام صرف میچ کی صبح کھلاڑیوں کو کیچنگ پریکٹس کرانا رہ گیا تھا۔

سابق ہیڈ کوچ نے کہا کہ انگلینڈ کے خلاف پہلے میچ کے بعد گروپ پر ایک ٹیکسٹ میسج سے نئی سلیکشن کمیٹی کی خبر ملی، سلیکشن کمیٹی کے معاملے پر بھی ان سے سے کوئی بات نہیں کی گئی تھی جبکہ بابر اعظم کو انگلینڈ کیخلاف ٹیسٹ سیریز سے ڈراپ کرنے کا فیصلہ نئی سلیکشن کمیٹی کا تھا۔

جیسن گلیسپی نے مزید کہا کہ ہیڈ کوچ کا سلیکٹرز سمیت سب سے رابطہ ضروری ہوتا ہے، پلاننگ کے لیے ضروری ہے کہ کوچ کو اسکواڈ کے بارے میں علم ہو لیکن ان سب چیزوں کی عدم موجودگی میں کام کرنا مشکل ہوگیا تھا۔