پاکستان سپر لیگ ( پی ایس ایل) کے دسویں ایڈیشن کے لیے ڈرافٹنگ 11 جنوری کو ہوگی۔

پی ایس ایل کے دسویں سیزن کے ڈرافٹ کے پرومو میں پی ایس ایل پلیئر ڈرافٹ 11.1 لکھا ہوا ہے۔ یعنی پی ایس ایل پلیئر ڈرافٹ 11 جنوری 2025 کو ہوگا۔

پی ایس ایل کا رواں ایڈیشن فروری-مارچ  میں چیمپئنز ٹرافی 2025 کے باعث اپریل کے اوائل اور مئی کے وسط کے درمیان چار ہفتوں کے دورانیے میں ہوگا۔

پی سی بی نے اب آئی پی ایل کے ساتھ تاریخوں کے تصادم کو خاطر میں نہ لانے کا فیصلہ کیا ہے۔

پی ایس ایل کو آئی پی ایل کی سلاٹ میں منتقل کرنے کا ایک فائدہ یہ بھی ہوگا کہ اس دوران کوئی بھی بین الاقوامی فکسچر نہ ہونے کی وجہ سے غیر ملکی کھلاڑی پورے سیزن کے لیے باآسانی دستیاب ہوں گے۔

ذرائع کا کہنا ہے کہ رواں ہفتے پی ایس ایل کی میٹنگ دوبارہ ہوگی جبکہ رواں ہفتے ہی ملکی و غیر ملکی کھلاڑیوں کی رجسٹریشن کا عمل بھی شروع ہوجائے گا۔

اگرچہ کھلاڑیوں کی دستیابی کے بارے میں مزید تفصیلات کا اعلان نہیں کیا گیا ہے لیکن امکان ہے کہ ڈرافٹ میں ان کھلاڑیوں کو شامل کیا جائے گا جو آئی پی ایل کی نیلامی میں فروخت نہیں ہوئے تھے۔

واضح رہے کہ رواں برس آئی پی ایل میں ڈیوڈ وارنر، کین ولیمسن، عقیل حسین، جونی بیئراسٹو، عادل رشید اور کیشو مہاراج جیسے بڑے نامور کھلاڑی کسی بھی فرنچائز کا حصہ بننے میں ناکام رہے ہیں۔