لاہور: سہ فریقی ٹی ٹوئنٹی سیریز میں پاکستان کے اوپنر صاحبزادہ فرحان نے تاریخ رقم کر دی، وہ ایک کیلنڈر ایئر میں 100 چھکے لگانے والے پہلے پاکستانی بلے باز بن گئے۔
سری لنکا کے خلاف میچ میں پانچ چھکوں کی بدولت وہ اس سنگ میل تک پہنچے، اور اب تک وہ رواں سال میں 102 چھکے لگا چکے ہیں۔
فرحان نے سری لنکا کے خلاف میچ میں ناقابلِ شکست 80 رنز کی دھواں دار اننگز کھیلی، جس میں چھ چوکے اور پانچ چھکے شامل تھے۔
مزید پڑھیں: حارث رؤف اور صاحبزادہ فرحان کی پیشی؛ آئی سی سی کا بڑا فیصلہ سامنے آگیا
ان کی اننگز کا اسٹرائیک ریٹ 177.77 رہا۔ یہ پاکستان کی جانب سے سری لنکا کے خلاف ٹی ٹوئنٹی میں سب سے بڑی انفرادی اننگز ہے، جو اس سے قبل شعیب ملک کے 57 رنز کا ریکارڈ تھا۔
دنیا میں رواں سال سب سے زیادہ ٹی ٹوئنٹی چھکے لگانے والوں میں فرحان تیسرے نمبر پر پہنچ گئے ہیں۔ آسٹریلیا کے کرن بیر سنگھ (122) اور ویسٹ انڈیز کے نکولس پورن(103) ان سے آگے ہیں۔
رواں سال ففٹی پلس اننگز میں بھی فرحان 15 بار 50 یا اس سے زائد رنز بنا کر پورن اور کرن بیر کے ہم پلہ ہو گئے ہیں۔ ان کے کھاتے میں 4 سنچریاں اور 11 نصف سنچریاں شامل ہیں۔
مزید پڑھیں: صاحبزادہ فرحان اور دھونی کے اسٹائل میں مماثلت، مگر اعترض کیوں؟ گن سیلیبریشن اورکون کون کرچکا؟
میچ میں سری لنکا نے پہلے بیٹنگ کرتے ہوئے 7 وکٹوں کے نقصان پر 128 رنز بنائے تھے۔ پاکستان کی جانب سے محمد نواز نے 16 رنز کے عوض 3 وکٹیں حاصل کیں جبکہ سلمان مرزا، فہیم اشرف اور ابرار احمد نے ایک ایک وکٹ لی۔
ہدف کے تعاقب میں صاحبزادہ فرحان کی جارحانہ بلے بازی نے پاکستان کو 27 گیندیں باقی رکھتے ہوئے 7 وکٹوں سے کامیابی دلائی۔
پاکستان نے سیریز میں اپنے دونوں میچ جیت لیے ہیں اور پوائنٹس ٹیبل پر سرفہرست ہے۔ محمد نواز کو شاندار باؤلنگ پر پلیئر آف دی میچ قرار دیا گیا ہے۔