فیس بک نے اپنے صارفین کو ڈیٹا کے حوالے سے زیادہ سے زیادہ کنٹرول دینے کا فیصلہ کیا ہے اور اس سلسلے میں ایک کارآمد ٹول متعارف کرایا جارہا ہے۔

تفصیلات کے مطابق فیس کی جانب سے متعارف کردہ ٹول کی مدد سے صارفین اپنے ڈیٹا یا میڈیا فائلز کو دیگر سروسز میں منتقل کرسکیں گے۔اس فیچر کی بدولت صارفین اپنی فیس بک پر موجود تصاویر اور ویڈیوز کسی اور آن لائن سروس جیسے گوگل فوٹوز پر بھی منتقل کرسکیں گے۔

دنیا کی نمبر ون سوشل میڈیا کمپنی نے گوگل فوٹوز سے ہی اس ٹول کا آغاز کیا ہے اور یہ گوگل، مائیکرو سافٹ، ٹویٹر اور فیس بک کے درمیان طے پانے والے ڈیٹا ٹرانسفر پروجیکٹ کا حصہ ہے، جس کا مقصد ان سروسز کے درمیان اطلاعات کی منتقلی کو آسان تر بنانا ہے۔

یہ نیا اوپن سورس پروجیکٹ ڈیٹا ٹرانسفر پروجیکٹ، صارفین کو ان تمام پلیٹ فارمز کے درمیان ڈیٹا ٹرانسفر کرنے کا آسان اور باسہولت آپشن فراہم کرے گا۔اگر سب کچھ طے شدہ منصوبے کے مطابق ہوا تو صارفین کا ڈیٹا ایک سے دوسری سروس میں بغیر ڈاؤن لوڈ یا اپ لوڈ کیے منتقل ہوسکے گا۔

کمپنی نے فی الحال یہ ٹول تجرباتی طور پر آئرلینڈ میں متعارف کرایا گیا ہے اور 2020 کی دوسری سہ ماہی تک یہ دنیا بھر میں پیش کیے جانے کا امکان ہے۔یہ ٹول فیس بک سیٹنگز میں یور فیس بک انفارمیشن میں موجود ہوگا اور یہ تمام ڈیٹا انکرپٹڈ ہوگا۔

 آپ کو ڈیٹا منتقل کرنے سے پہلے اپنے پاس ورڈ کا اندراج کرنا ہوگا۔ خیال رہے کہ فیس بک کی ذیلی کپمنی انسٹاگرام نے بھی گزشتہ سال اس طرح کا ٹول متعارف کرانے کا اعلان کیا تھا۔

یاد رہے کہ صارفین کے لیے تمام سوشل میڈیا پلیٹ فارمز پر ڈیٹا الگ  الگ اپ لوڈ کرنا ہمیشہ سے ایک مسئلہ رہا ہے اوراس کے حل کے لیے ماضی میں بھی سماجی رابطے کو ویب سائٹس کی جانب سے کئی کوششیں کی جاچکی ہیں۔