ویڈیوشیئرنگ ویب سائٹ یوٹیوب نے  دھمکی آمیز مواد  شیئر کرنے پر پابندی عائد کردی ہے۔

تفصیلات کے مطابق گزشتہ روزہراسگی کے متعلق اپنی پالیسیوں کو وسعت دیتے ہوئے نسل، جنس یا جنسی رجحانات کی وجہ سے بدنیتی پر مبنی توہین اوردھمکی آمیز مواد شیئر کرنے پر پابندی عائد کر دی ہے۔

یوٹیوب کے ٹرسٹ اور سیفٹی شعبہ کے عالمی سربراہ میٹ ہالپرین نے غیرملکی میڈیا سے بات کرتے ہوئے کہا کہ اب ہم ایسے مواد کی اجازت نہیں دیں گے جو کسی کی نسل ، صنفی اظہار ، یا جنسی رجحان جیسے معاملات پر کسی کی بدنیتی سے توہین کرے۔

انہوں نے کہا کہ یہ قانون نجی افراد سے لے کر یوٹیوب کے تخلیق کاروں، عوامی عہدیداروں تک سب پر لاگو ہوگا۔

میٹ ہالپرین کا مزید کہنا تھا کہ یوٹیوب پہلے ہی واضح خطرات پر مبنی وڈیوز اور دیگر مواد شیئر کرنے پر پابندی عائد کرچکا ہے، لیکن اب پوشیدہ خطرات  پر  مبنی ویڈیوز پر بھی پابندی لگائی جارہی ہے۔

واضح رہے کہ یوٹیوب ویڈیو شیئرنگ کی سب سے بڑی ویب سائٹ مانی جاتی ہے۔ اس کی بنیاد فروری 2005 میں پے پال کے چاڈ ہرلے،اسٹیو چین اور جاوید کریم نامی  تین سابق ملازمین نے رکھی تھی۔

بعد ازاں گوگل نے نومبر 2006 میں  یوٹیوب کو 1.6 بلین میں خرید لیا تھا۔