’ونڈوز 7‘ آپریٹنگ سسٹم کی اپڈیٹ کی فراہمی ختم کردی گئی ہے۔

تفصیلات کے مطابق  امریکی ملٹی نیشنل کمپنی ’مائیکرو سافٹ‘ نے دنیا بھر کے کمپیوٹرز پر موجود ’ونڈوز 7‘ آپریٹنگ سسٹم کی اپڈیٹ کی فراہمی ختم کردی۔

مائیکرو سافٹ کی جانب سے ’ونڈوز 7‘ کی اپڈیٹس کی فراہمی بند کیے جانے کے بعد دنیا بھر کے کروڑوں کمپیوٹرز 14 جنوری 2020 سے ’ونڈوز 7‘ کی کسی بھی اپڈیٹ سے محروم ہوگئے ہیں۔

یاد رہے کہ مائیکرو سافٹ کی جانب سے ایک سال قبل اعلان کر دیا گیا تھا کہ کمپنی جنوری 2020 سے ’ونڈوز 7‘ کی اپڈیٹ کی فراہمی بند کر دے گی۔

واٹس ایپ کا آئندہ ماہ سے ہزاروں فونز پر سروس بند کرنے کا فیصلہ

خیال رہے کہ دنیا بھر میں اس وقت بھی 32 فیصد سے زیادہ کمپیوٹر اور لیپ ٹاپ ’ونڈوز 7‘ پر کام کر رہے ہیں یعنی دنیا کے ہر تین کمپیوٹرز میں سے ایک کمپیوٹر پر مذکورہ آپریٹنگ سسٹم موجود ہے۔

لوگوں کو مشورہ دیا گیا ہے کہ وہ 14 جنوری 2020 کے بعد اپنے سسٹمز میں کمپنی کے معروف آپریٹنگ سسٹم ’ونڈوز 10‘ کو انسٹال کرلیں۔

کمپنی کے مطابق ’ونڈوز 10‘ کو 139 امریکی ڈالر کے عوض خریدا جا سکتا ہے۔

ساتھ ہی کمپنی نے خبردار کیا کہ اپڈیٹ کے بغیر ونڈوز 7 پر چلنے والے کمپیوٹرز و لیپ ٹاپ پر وائرس حملہ کر سکتے ہیں اور مذکورہ ڈیوائسز سائبر سیکیورٹی کا مسئلہ بھی بن سکتی ہیں۔

واضح رہے کہ ونڈوز 7 کو کمپنی نے 2009 میں متعارف کرایا تھا۔