انٹرنیٹ کی دنیا میں سن گن لینے والی ویب سائٹ نے خبر دی ہے کہ دنیا بھرکو جس فون کا انتظارہے وہ سام سنگ کا فولڈ ہونے والا فون زیڈ فولڈ فور ہے اور اب معلوم ہوا ہے کہ اس میں گوریلا گلاس کا نیا اور بہتر ورژن بھی ہوگا۔

تجزیہ نگاروں کے مطابق گوریلا گلاس وِکٹس کو زیڈ فولڈ فور میں استعمال کیا جائے گا۔ ڈسپلے اور پچھلے پینل پر ، دونوں مقامات پر یہ پینل موجود ہوگا جس کی تصدیق دیگر ذرائع نے بھی کی ہے۔

اگرچہ صرف چھ دن بعد اس کی تصدیق ہوجائے گی لیکن دنیا بھر کے ماہرین سام سنگ کی مرکزی مصنوعات پر قیاس آرائیاں کررہے ہیں خواہ فلیگ شپ فون ہوں یا واچ ہوں۔

دوسری جانب یہ بھی کہا گیا ہے کہ فولڈ ہونے والے حصے کو بہتر بنانے کے لے ڈیزائننگ میں اور مٹٰیریئل میں بھی بنیادی تبدیلیاں کی گئ ہیں۔

دیگر تفصیلات سے ظاہر ہوا ہے کہ 25 واٹ چارجر سے فولڈ فون کو چارج کیا جائے گا۔ دوسری جانب بیٹری کی استعداد میں کوئی خاص اضافہ نہیں کیا گیا ہے جو اب بھی شاید 4270 ایم اے ایچ ہوگی۔ تاہم چارجنگ کو مزید بہتر بنایا گیا ہے جس کے لیے سرکٹ میں بھی تبدیلیاں کی گئ ہیں۔ سام سنگ کے اندرونی ذرائع بتاتے ہیں کہ نصف گھنٹے کی چارجنگ سے سام سنگ زیڈ فولڈ 50 فیصد تک بیٹری پر پہنچے گا لیکن قیاس ہے کہ شاید 33 فیصد بیٹری ہی بھر پائے گی۔

سام سنگ کے اس کیمرے کو بہتر بنانے کی بھرپور کوشش کی ہے۔ بیزل کو مزید باریک کیا گیا ہے۔ مرکزی کیمرے کی افادیت 50 میگا پکسل ہوگی ۔ دوسرا کیمرہ 16 میگا پکسل اور انڈر ڈسپلے کیمرہ چار میگاپکسل تک کا ہوسکتا ہے۔

دوسری جانب اسنیپ ڈریگن ایٹ پلس جنریشن ون پروسیسر کی تصدیق پہلے ہی کی جاچکی ہے۔