چینی شہر نے 11,787 ڈرونز کے لائٹ شو کے ساتھ نیا عالمی ریکارڈ قائم کر دیا۔
چین کے شہر چونگ چنگ نے حال ہی میں 11,787 ڈرونز کے ساتھ ایک عظیم الشان لائٹ شو کا انعقاد کر کے گنیز ورلڈ ریکارڈ قائم کر دیا۔
چین بڑے پیمانے پر ڈرون لائٹ شوز کے لیے مشہور ہو چکا ہے، لیکن “چارمنگ چونگ چنگ” کے نام سے منعقدہ اس تقریب نے ڈرون شوز کے میدان میں ایک نیا کارنامہ انجام دے کر گنیز ورلڈ ریکارڈ حاصل کیا۔
تخمینہ ہے کہ 17 جون کی رات، شہر کے مرکز میں ایک لاکھ سے زائد افراد نے دنیا کا سب سے بڑا ڈرون لائٹ شو دیکھا، اور یہ نظارہ واقعی دیدنی تھا۔ 11,787 چھوٹے ڈرونز نے رات کو دن میں بدل دیا، اور ڈرون کی خوبصورت روشنی نے آسمان کو منور کر دیا۔
ان ڈرونز نے آسمان پر خوبصورت تصاویر اور چینی زبان میں مختلف پیغامات پر مبنی جملے تحریر کیے جو تصاویر کے ساتھ حرکت کر رہے تھے جنہیں دیکھ کر شائقین خوب محظوظ ہوئے، یہ تصاویر چینی تاریخ اور ثقافت پر مبنی تھی جن میں رنگ برنگے پھول، شہر کے مناظر، اور مقامی ماسکوٹس شامل تھی۔
تاہم، زیادہ تر حاضرین اس بات سے واقف نہ تھے کہ اس شاندار مظاہرے کے پیچھے کتنی محنت چھپی ہوئی تھی۔ ہر ایک ڈرون کی حرکت کو انجینیئروں نے نہایت درستگی سے ترتیب دیا تاکہ وہ اپنی جگہ پر جا کر درست نقشہ تشکیل دیں سکے، اس مقصد کے لیے ٹیم نے کئی بار ریہرسل کی اور مختلف تکنیکی خامیوں کو دور کیا۔
اگرچہ اس لائٹ شو کا مقصدعوام کو تفریح فراہم کرنا تھا، مگر دنیا کا سب سے بڑا ڈرون لائٹ شو منعقد کر کے چونگ چنگ نے نہ صرف اپنی ڈرون کلسٹر ٹیکنالوجی اور کم بلندی والے فضائی نظم و نسق کی صلاحیت کو اجاگر کیا بلکہ یہ بھی ثابت کیا کہ یہ شہر ڈرون سازی، تحقیق، اور ٹیکنالوجی کا ایک بڑا مرکز بن چکا ہے۔
