امریکی صدارتی انتخابات سے متعلق ڈیموکریٹ کی صدارتی امیدوار کملا ہیرس کا اہم بیان سامنے آگیا۔

 نائب صدر کملا ہیرس نے سماجی رابطے کی ویب سائٹ ’ایکس‘ پر انتخابی عمل کے دوران اپنی ایک پوسٹ میں کہا کہ ہم سب مل کر امریکا کے اس وعدے کے لیے لڑ رہے ہیں جس میں سب کے لیے آزادی، مواقع اور مساوات کا عہد شامل ہے۔

قبل ازیں امریکی صدارتی انتخابات میں ریپبلیکن پارٹی کے امیدوارڈونلڈ ٹرمپ نے کہا تھا کہ اگر انتخابات منصفانہ ہوئے تو شکست تسلیم کروں گا۔

انکا کہنا تھا کہ الیکشن میں بڑی لیڈ سے کامیابی حاصل کریں گے، ایران کو جوہری ہتھیار رکھنے کی اجازت نہیں دیں گے، انتخابی مہم بہت شاندار تھی، الیکشن نہ جیتا تو ہار تسلیم کروں گا۔

ڈونلڈ ٹرمپ نے سول سیکرٹ سروس پر تنقید کرتے ہوئے کہا کہ سول سیکرٹ سروس کی وجہ سے پہلے مشکلات پیش آئیں، مجھ پر مشین گنیں تانی گئیں، ایسا ساری زندگی نہیں دیکھا۔

واضح رہے کہ سینتالیسویں امریکی صدر کے انتخاب کے لئے تمام ریاستوں میں پولنگ کا عمل جاری ہے، پانسہ پلٹنے والی ریاستوں پینسلوینیا اور شمالی کیرولائنا پر سب کی نظریں جمی ہوئی ہے۔

پہلی ریاست میں 19 جبکہ دوسری میں 16 الیکٹورل ووٹس کا فیصلہ ہوگا، کسی بھی امیدوار کو جیت کے لئے کم از کم 270 الیکٹورل ووٹ درکار ہوں گے۔