محکمہ موسمیات کے مطابق کراچی میں رواں ہفتے سو سالہ سردی کا ریکارڈ ٹوٹنے کا امکان ہے۔

محکمہ موسمیات نے اگلے ہفتے موسم کی پیشگوئی کرتے ہوئے آگاہ کیا کہ کراچی میں سردی کی نئی لہر داخل ہو گئی ہے جس کے بعد 18 جنوری تک موسم شدید سرد رہے گا اور کراچی میں سردی کا سو سالہ ریکارڈ ٹوٹنے کا امکان ہے۔

 پی ایم ڈی کے مطابق  آج ایک نئی سردی کی لہر دیکھی جارہی ہے ، جو 18 جنوری تک جاری رہے گی۔کراچی  شہر میں پارہ 3 ڈگری سینٹی گریڈ تک کم رہنے کا امکان ہے، جس سے شہری سردی سے لرز اٹھیں گے۔

70 سال سے زیادہ کی ریکارڈ شدہ تاریخ میں یہ کراچی کا سب سے کم درجہ حرارت ہوگا۔واضح رہے کہ   فروری 1950 میں  کراچی میں سب سے کم درجہ حرارت 3.3 ڈگری سینٹی گریڈ  ریکارد کیا گیا تھا ۔

دوسری  جانب کراچی میں سائبرین ہواؤں کا سلسلہ جاری ہے اور اتوار کی شام کو کچھ علاقوں میں ہلکی بارش بھی ریکارڈ کی گئی جس کی وجہ سے سردی کی شدت میں اضافہ ہو گیا ہے۔

پاکستان میٹرولوجیکل ڈیپارٹمنٹ (پی ایم ڈی) کی رپورٹ کے مطابق ، ملک بھر میں بارشوں کا نیا سسٹم پیر کو داخل ہو گیا ہے جس کی وجہ سے خیبرپختونخوا ، بالائی اور وسطی پنجاب ، اسلام آباد ، گلگت بلتستان اور کشمیر میں بارش جاری ہے۔

جبکہ خیبر پختونخوا کے بالائی علاقوں، گلگت بلتستان اور کشمیر کے علاقوں میں آج برفباری کا سلسلہ جاری ہے۔