محکمہ موسمیات کا کہناہے کہ ملک کے بیشترعلاقوں میں موسم خشک جبکہ بالائی علاقوں میں ابرآلود رہے گا۔

تفصیلات کےمطابق محکمہ موسمیات کاکہناہےکہ جڑواں شہروں سمیت آج ملک بھرمیں موسم خشک رہے گا اور مطلع مکمل طور پر صاف ہوگا۔ سورج اپنی پوری آب و تاب کے ساتھ موجود رہے گا جس سے سردی کی شدت میں کمی آئے گی۔

گلگت بلتستان اور کشمیر سمیت ملک کے بالائی علاقوں میں موسم جزوی طورپرابرآلود رہنے کا امکان ہے۔

وفاقی دارالحکومت سمیت ملک کے بالائی علاقوں میں گزشتہ پانچ روزجاری بارش وبرفباری کا سلسلہ اب تھم گیا ہے۔ جس کے بعد معمولات زندگی بحال ہونا شروع ہو گئے ہیں جبکہ بالائی علاقوں میں پڑنے والی برف کو مشینری کے ذریعے سڑکوں سے ہٹا کر راستے بحال کیے جانے کا سلسلہ جاری ہے۔

گزشتہ 24 گھنٹے کے دوران بالائی پنجاب، کشمیر اور اسلام آباد سمیت مختلف اضلاع میں بارش ہوئی اس دوران مالم جبہ، کالام اور مری میں وقفے وقفے سے برفباری کا سلسلہ جاری رہا۔

مالم جبہ میں 112 ملی میٹر، چراٹ میں 69 ملی میٹر، بالاکوٹ میں 33، کالام میں 30 ملی میٹر، سیدو شریف میں 29 ملی میٹر، پشاور میں 24 ملی میٹر، چکوال میں 25 ملی میٹر، اسلام آباد میں 17 ملی میٹر بارش ریکارڈ کی گئی۔