ملک بھر کے بیشتر علاقوں میں شدید گرمی کی لہر برقرار ہے، صبح سویرے سورج اپنی پوری آب و تاب کے ساتھ چمکنے لگا جبکہ ہیٹ اسٹروک کا خطرہ بھی نہ ٹل سکا۔

محکمہ موسمیات کے مطابق سندھ اور پنجاب شدید گرمی کی لپیٹ میں ہیں، سندھ میں قیامت خیز گرمی کی لہر برقرار ہے، موہنجوداڑو 51 ڈگری کے ساتھ گرم ترین علاقہ بن گیا۔

اس کے علاوہ جیکب آباد، دادو، لاڑکانہ، نواب شاہ، ٹھٹہ، سکھر سمیت دیگر شہر بھی شدید گرمی سے جلنے لگے ہیں۔

موسم کا حال بتانے والوں کا کہنا تھا کہ کراچی والے بھی گرمی سے بے حال ہوگئے ہیں جبکہ شہر میں رواں ہفتے گرمی مزید بڑھنے کی بھی پیشگوئی کی گئی ہے۔

محکمہ موسمیات نے بتایا کہ اسلام آباد اور گر دو نواح میں بھی موسم شدید گرم ہے جبکہ ملتان، سرگودھا، گوجرانوالا، بہاولنگر، بھکر، کوٹ ادو اور رحیم یار خان سمیت پنجاب کے شہروں میں بھی گرمی اور حبس نے شہریوں کو نڈھال کردیا۔

دوسری جانب بلوچستان کے میدانی علاقوں بھی گرم ہواؤں کے ڈیرے جاری ہیں، معمولات زندگی بری طرح متاثر ہوگئی ہیں۔

محکمہ موسمیات نے مزید بتایا کہ خیبرپختونخوا کے بیشتر میدانی اضلاع میں بھی موسم شدید گرم رہے گا جبکہ دن کا درجہ حرارت معمول سے 04 سے 06 ڈگری سینٹی گریڈ زیادہ رہنے کا امکان ہے۔

محکمہ موسمیات کے مطابق آئندہ چند روز میں گرمی مزید قیامت ڈھا سکتی ہے، شہری گرمی سے بچاؤ کیلئے احتیاطی تدابیر اختیار کریں اور غیر ضروری باہر نکلنے سے گریز   اور پانی کا زیادہ سے زیادہ پیئیں۔