محکمہ موسمیات نے کراچی میں مزید بارش کی پیشگوئی کردی ہے۔

چیف میٹرولوجسٹ سردار سرفراز نے بتایا ہے کہ بارش کا سبب بننے والا ہوا کا کم دباؤ مغربی سندھ کے قریب ہے، اس سسٹم کے زہر اثر کراچی میں دن بھر اور رات میں بھی وقفے وقفے سے بارش کا امکان ہے۔

سردار سرفراز کا کہنا ہے کہ شہر کے بیشتر مقامات پر ہلکی سے معتدل اور چند مقامات پر تیز بارش کا امکان ہے جبکہ کل شہر میں مطلع ابر آلود اور ہلکی بارش یا بونداباندی کا امکان رہے گا۔

چیف میٹرولوجسٹ نے مزید بتایا کہ مون سون کا ایک اور سسٹم 10 یا 11 اگست کو بھارتی راجستھان سے مشرقی سندھ میں داخل ہوسکتا ہے، اس سسٹم کے زیر اثر کراچی میں 12 یا 13 اگست کو بارش کا امکان رہے گا۔

واضح رہے کہ شہر قائد کے مختلف علاقوں میں گزشتہ رات سے اب تک ہلکی بارش کا سلسلہ جاری ہے جبکہ آج بھی بارش کا امکان ظاہر کیا گیا ہے۔

گزشتہ روز ہونے والی بارش کے بعد شہر کی سڑکوں کی ابتر صورتحال ہے، لیاقت آباد انڈر پاس میں پانی جمع ہونے کے باعث انڈر پاس بند کر دیا گیا ہے۔

شہر میں گزشتہ رات 8 تا آج صبح 8 بجے تک سب سے زیادہ بارش ناظم آباد میں 76.5 ملی میٹر ریکارڈ کی گئی۔

کراچی میں اربن فلڈنگ کا خدشہ

کراچی میں اربن فلڈنگ کے خدشے کے پیش نظر این ڈی ایم اے نے کراچی کے لیے اپنی نئی ایڈوائزری جاری کردی ہے جس کے مطابق شہر قائد کو اربن فلڈنگ کا خطرہ ہے اور اگلے 2 دن میں ممکنہ بارشوں کے باعث کراچی ڈویژن میں اربن فلڈنگ کا خطرہ ظاہر کیا گیا ہے۔

محکمہ موسمیات کے مطابق کراچی ڈویژن میں آج سے 6 اگست تک گرج چمک کے ساتھ بارشوں کا امکان ہے۔

این ڈی ایم اے کا کہنا ہے کہ کراچی میں موسلادھار بارشیں اربن فلڈنگ اور سیلابی صورتحال کا باعث بن سکتی ہیں۔

اربن فلڈنگ کے اثرات سے بچنے کے لیے نشیبی علاقوں کے رہائشی چھتوں اور کھڑکیوں کو مناسب طریقے سے واٹر پروف بنائیں اور برساتی پانی جمع ہونے سے بچنے کے لیے خصوصی اقدامات اٹھائیں، گٹر اور نکاسی آب کے نظام کو مؤثر بنائیں۔

این ڈی ایم اے کی ایڈوائزری میں تمام متعلقہ محکموں کو الرٹ رہنے اور حفاظتی اقدامات کی ہدایت جاری کی گئی ہیں۔