آئندہ 24 گھنٹوں کے دوران ملک کے زیادہ تر علاقوں میں موسم سرد اور خشک رہے گا جبکہ پہاڑی علاقوں میں رات اور صبح کے اوقات شدید سردی کے ساتھ درجہ حرارت میں مزید کمی متوقع ہے۔
محکمہ موسمیات کے مطابق پنجاب اور خیبرپختونخوا کے میدانی علاقوں میں صبح اور رات کے دوران دھند اور اسموگ چھانے کا امکان ہے جبکہ آئندہ چند روز میں دھند کی شدت میں بتدریج اضافہ بھی متوقع ہے۔
اسلام آباد اور گردونواح میں آج موسم سرد اور خشک رہے گا جبکہ کشمیر اور گلگت بلتستان میں موسم شدید سرد اور خشک رہنے کے ساتھ صبح و رات کے اوقات میں سردی کی شدت میں اضافہ ریکارڈ ہونے کا امکان ہے۔
مزید پڑھیں: رواں سال ملک بھر میں کتنی سردی پڑے گی، این ڈی ایم اے نے بتادیا
خیبرپختونخوا کے شہروں پشاور، صوابی، مردان اور ڈیرہ اسماعیل خان میں صبح اور رات کے دوران بعض مقامات پر ہلکی سے درمیانی دھند پڑنے کی توقع ہے۔
اس کے علاوہ پنجاب، سندھ اور بلوچستان کے بیشتر اضلاع میں موسم مجموعی طور پر خشک رہے گا، تاہم رات اور صبح کے اوقات میں ٹھنڈ کا احساس بڑھ جائے گا۔
بلوچستان کے شمالی علاقوں میں سردی کی شدت زیادہ رہنے اور موسم شدید سرد ہونے کی پیشگوئی کی گئی ہے۔
