امریکہ نے کہاہے کہ ان کے بحری جہازنے ایرانی ڈرون کی جانب سے دھمکیوں کے بعد اسے آبنائے ہرمزمیں مارگرایاہے۔

غیر ملکی خبر رساں ادارے کے مطابق وائٹ ہاؤس میں اظہارخیال کرتے ہوئے امریکی صدرڈونلڈٹرمپ نے کہاکہ امریکہ کے بحری جہازیوایس ایس باکسرنے ایک ایرانی ڈرون کو تباہ کیا جس نے امریکی بحری جہاز کے اوپر ایک ہزارگز کی بلندی پر پرواز کرتے ہوئے اسے دھمکی دی تھی۔

امریکی صدر کا کہنا تھا ایران کی بین الاقوامی پانیوں میں موجود جہاز کے خلاف کارروائی انتہائی اشتعال انگیز ہے، امریکا اپنے مفادات کے تحفظ کا حق رکھتا ہے۔

ٹرمپ نے مزید کہا کہ وہ دیگر اقوام کو بھی کہتے ہیں کہ وہ ہمارے ساتھ مستقبل میں کام کرنے کے لیے آبنائے ہرمز سے گزرنے والے اپنے جہازوں کی حفاظت کریں۔

پینٹاگون کے ترجمان نے بتایا کہ ایرانی ڈرون خطرناک حد تک جہاز کے انتہائی قریب آیا جس کے بعد جہاز نے اپنا تحفظ یقینی بنانے کے لیے دفاعی ایکشن لیا۔

دوسری جانب اقوام متحدہ میں صحافیوں سے گفتگو کرتے ہوئے ایرانی وزیرخارجہ محمدجوادظریف نے کہاکہ ہمارے پاس ڈرون مارگرانے کے بارے میں کوئی اطلاع نہیں ہے۔