افغانستان کے دارالحکومت کابل میں پاکستانی سفارتخانے نے افغانوں کے لیے ویزہ سروس بحال کرنے کا اعلان کیا ہے یہ ویزہ سروس اتوار 29 دسمبر سے بحال ہوگی۔

کابل میں پاکستانی سفارت خانے کے ایک ترجمان عدیل خان نے بتایا کہ کابل میں پاکستانی سفارتخانہ کل سے ویزہ سروس شروع کر دے گا۔

ان کا کہنا تھا کہ پشاور میں بھی افغان قونصل خانے کا آپریشن بحال ہو گیا ہے۔

افغانستان نے اپنا قونصل خانہ 11 اکتوبر جبکہ پاکستان نے کابل میں ویزہ آپریشن 3 نومبر کو بند کر دیا تھا۔

کابل میں پاکستانی سفارتخانے نے کہا تھا کہ سکیورٹی وجوہات کی بنا پر ویزہ سیکشن کو بند کیا جارہا ہے۔

پاکستانی سفارت خانے نے سفارتی عملے کو ہراساں کرنی کی شکایت کی تھی۔

امریکہ، افغانستان سے 4000 فوجیوں کے انخلا کا اعلان کرے گا

جبکہ افغانستان نے پشاور میں اپنا قونصل خانہ افغان مارکیٹ کی ملکیت کے تنازعے کی وجہ سے بند کیا تھا۔

کابل میں صحافی انیس الرحمان کہتے ہیں کہ دوسرے صوبوں میں پاکستانی قونصلیٹ افغان عوام کو ویزے جاری کرتا ہے تاہم کابل سے زیادہ لوگ پاکستان جاتے ہیں تو وہاں کے لوگ اس سے زیادہ متاثر تھے۔

ان کا مزید کہنا ہے کہ افغان اس انتظار میں تھے کہ کب ویزہ سروس دوبارہ بحال ہوگی۔

’تقریباً دو مہینوں سے ویزہ سیکشن بند ہے، پاکستان میں ہمارے، رشتہ دار، دوست، اور استاد ہیں اور دوسری بات یہ کہ ہمارے لوگ علاج اور کاروبار کے لیے پشاور، اسلام آباد اور لاہور جاتے ہیں۔

اس کے علاوہ سب سے اہم بات کسی کی بیویاں پاکستان میں ہیں تو کسی کے شوہر، ان کو گذشتہ دو ماہ میں مشکل کا سامنا کرنا پڑا اور بدقسمتی یہ ہے کہ دونوں ممالک میں اس پر کوئی قانون موجود نہیں۔

ان کا مزید کہنا ہے جب دو ملکوں کے درمیان تعلقات شدید خراب ہوتے ہیں تو پھر وہ سفارتخانے بند کر دیتے ہیں۔