ادلب ٹینشن فری زون میں رہائشی جگہوں پر حملوں کے نتیجے میں 12 ہزار شہری ہجرت کر کے ترکی کی سرحد سے قریبی علاقوں میں پہنچ گئے۔

ذرائع کے مطابق شام میں اسد فورسز اور روس کی طرف سے ادلب ٹینشن فری زون میں رہائشی جگہوں پر حملوں کے نتیجے میں حالیہ 24 گھنٹوں کے دوران 12 ہزار شہری ہجرت کر کے ترکی کی سرحد سے قریبی علاقوں میں پہنچ گئے ہیں۔

ادلب ٹینشن فری زون میں بے دخل کئے گئے شہریوں کے بارے میں ڈیٹا کوآرڈینیشن  دفتر کے ڈائریکٹر محمد حلّاج نے کہا ہے کہ اسد انتظامیہ اور اس کے حامیوں کے ادلب پر حملوں میں اضافوں کی وجہ سے ہجرت  کے اعداد و شمار میں بھی اضافہ ہو گیا ہے۔

ڈائریکٹر محمد حلّاج نے کہا کہ سب سے زیادہ ہجرت  ادلب کے جنوبی علاقوں اور تحصیل مرات النعمان  کے دیہی علاقوں سے کی گئی ہے اور گھر سے بے گھر ہونے والے کنبوں کو فوری طور پر سر چھپانے  کے لئے خیموں، کمبلوں اور بستروں جیسی بنیادی اشیاء کی  فوری ضرورت ہے۔

ڈائریکٹر محمد حلّاج نے  مزید کہا کہ ادلب ٹینشن فری زون میں شدت پکڑتے حملوں کی وجہ سے ماہِ نومبر سے لے کر اب تک 20 ہزار کنبوں پر مشتمل تقریباً ایک لاکھ 10 ہزار شہری گھر سے بے گھر ہو چکے ہیں۔

پاکستان مہاجرین رکھنے والا دنیا کا دوسرا بڑا ملک

واضح رہے کہ گزشتہ روز  وزیراعظم عمران خان نے  مہاجرین کے مسائل سے متعلق ویڈیو بیان  میں کہا  تھا کہ پاکستان مہاجرین کی بڑی تعداد رکھنے والا دنیا کا دوسرا بڑا ملک بن چکا ہے۔

 عمران خان نے کہا کہ پاکستان پچھلے چالیس برس افغان مہاجرین کو پناہ دیے ہوئے ہے جبکہ پاکستانیوں نے مہاجرین کو پناہ دینے کے سلسلے میں بڑے دل کا مظاہرہ کیا۔

وزیراعظم  نے  یہ بھی کہا  تھا کہ مہاجرین کی شاندار مہمان نوازی کرنے پر پاکستانی عوام کو خراج تحسین پیش کرتا ہوں جبکہ 80 فیصد سے زیادہ مہاجرین ترقی پذیر ممالک میں ہے جن میں  70 فیصد سے زیادہ مہاجرین خواتین اور بچے ہیں ۔

وزیراعظم عمران خان کا مزید کہنا تھا  کہ ایسے تنازعات کو روکنا ہوگا جن کے باعث مہاجرین کی بڑی تعداد جنم لیتی ہے اور ترقی یافتہ ممالک تنازعات کے خاتمے میں اپنا اہم کردار ادا کریں۔