ایرانی میزائل حملے میں 34 فوجیوں کو دماغی چوٹیں آئیں، پینٹاگون
امریکی محکمہ دفاع(پینٹاگون )نے عراق میں امریکی فوجی اڈے پر ایرانی حملے میں 34 فوجیوں کے زخمی ہونے کا اعتراف کرلیا۔
غیر ملکی خبر رساں اداروں کے مطابق پینٹاگون کے ترجمان نے تصدیق کی ہےکہ ایران کے 8 جنوری کو بغداد میں امریکی بیس پر کیے گئے حملے میں 34 امریکی فوجیوں کو شدید دماغی چوٹیں آئیں ہیں۔
ایک ترجمان میڈیا نمائندگان کو بتایا کہ فی الحال 17 فوجیوں کی اب بھی طبی نگہداشت کی جا رہی ہے۔ متاثرہ فوجیوں میں سے آٹھ کو مزید علاج کے لیے امریکہ بھیجا جا چکا ہے جبکہ دیگر نو کا جرمنی میں علاج جاری ہے۔
حکام کا کہنا ہے کہ دیگر 17 فوجیوں میں سے 16 کا علاج عراق اور ایک کا کویت میں کیا گیا جس کے بعد تمام 17 ڈیوٹی پر واپس آ گئے ہیں۔
اس سے قبل امریکی صدر ڈونلڈ ٹرمپ نے کہا تھا ایران کی طرف سے کیے جانے والے حملے میں کوئی بھی امریکی فوجی زخمی نہیں ہوا۔
صدر ٹرمپ کے مطابق امریکا نے ایران پر جوابی حملہ نہ کرنے کا فیصلہ بھی کسی فرد کے زخمی نہ ہونے کے پیشِ نظر کیا ہے۔
ابتداء میں تردید کے بعد گذشتہ ہفتے پینٹاگون کی جانب سے کہا گیا تھا کہ 11 فوجیوں کو حملے کے نتیجے میں آنے والی گہری دماغی چوٹوں کا علاج کیا جا رہا ہے۔
عراق میں امریکی فوج کے خلاف شدید احتجاج
اور پھر دو روز قبل مزید فوجیوں کو شدید دماغی چوٹیں آنے کا اعتراف کیا گیا تھا تاہم اس سے پہلے ان کی تعداد نہیں بتائی گئی تھی۔
پینٹاگون کا کہنا تھا کہ عین الاسد بیس پر ایرانی میزائل حملے میں کوئی امریکی ہلاک نہیں ہوا تھا جبکہ زیادہ تر فوجیوں نے میزائل حملے کے دوران بنکرز میں پناہ لے لی تھی۔
یاد رہے کہ 3 جنوری کو عراقی دارالحکومت بغداد میں امریکی ڈرون حملے میں ایرانی پاسداران انقلاب کی قدس فورس کے سربراہ جنرل قاسم سلیمانی کی ہلاکت کے بعد مشرق وسطیٰ کی صورت حال انتہائی کشیدہ ہو گئی تھی۔
جس کے جواب میں ایران نے 7 اور 8 جنوری کی درمیانی شب میں بھرپور جوابی حملہ کرتے ہوئے بغداد میں واقع امریکی ایئر بیس پر درجنوں بیلسٹک میزائل داغ دیے تھے۔
ایرانی حکام نے دعویٰ کیا تھا کہ امریکی فوجی اڈوں پر میزائل حملوں میں 80 فوجی ہلاک ہوئے ہیں تاہم امریکا نے اس دعوے کے تردید کرتے ہوئے کہا تھا کہ حملوں میں کوئی فوجی ہلاک یا زخمی نہیں ہوا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News