سعودی دارالحکومت ریاض کے النظیم سے 9  کلو میٹر   مشرق میں  واقع  ایک آباد علاقے میں 10 نامعلوم   قبریں دریافت ہوئی ہیں، واقعہ رپورٹ ہونے پر حکام نے علاقے کا دورہ کیا تو قبریں کھول کر خالی کی جاچکی تھیں۔

غیر ملکی  خبر رساں ادارے  کے مطابق  سعودی عرب کے دارالحکومت ریاض کے ایک علاقے سے نامعلوم افراد کی 10 قبریں دریافت ہوئی ہیں۔ گمنام   قبروں کی دریافت نے پورے علاقے میں کھلبلی مچا دی ہے۔

ریاض کی بلدیاتی کونسل کے رکن ابراہیم فہید العنزی مشرقی ریاض کا دورہ کر رہے تھے جہاں ایک مقام پر اچانک ایک احاطے کے اندر وہ 10 قبریں دیکھ کر حیران رہ گئے۔

فہید العنزی کے مطابق احاطے کے 4 دروازے تھے مگر سب کے سب کھلے ہوئے تھے۔

انہوں نے کہا کہ زیادہ حیرت اس وقت ہوئی جب دوبارہ اس جگہ کا دورہ کیا تو پتا چلا کہ وہ قبریں ساری کی ساری کھلی ہوئی تھیں اور ان میں کچھ بھی نہیں تھا۔ اس سے لگتا ہے کہ اس کے پیچھے کوئی راز ہے۔

العنزی کا کہنا تھا کہ حیران کن بات یہ ہے کہ یہ احاطہ رہائشی محلوں اور وہاں موجود فیکٹریوں کے قریب واقع ہے۔

العنزی کا کہنا ہے کہ ’فوری طور پر میں نے کارروائی کی اور ایک خط میں نے بلدیاتی کونسل کو لکھا۔ کونسل نے ریاض میونسپلٹی کو اس کی اطلاع دی لیکن عجیب بات یہ ہے کہ ابھی تک اس حوالے سے کوئی کارروائی نہیں ہوئی۔

 ایک ہفتے قبل میں نے النظیم پولیس سٹیشن میں رپورٹ درج کرا کر پورے واقعہ کی تفصیلات بھی پیش کردی تھیں‘۔لیکن  واقعے کے 15 روز گزر  جانے کے بعد بھی کوئی  کارروائی  عمل  میں  نہیں  لائی  گئی ۔

العنزی نے کہا کہ ’یہ واقعہ ایسا نہیں جس پر خاموشی اختیار کی جائے۔ واقعہ کی تحقیقات اشد ضروری ہے۔ انہوں نے شبہ ظاہر کیا کہ اس میں غیر قانونی تارکین کا کوئی ہاتھ ہوسکتا ہے جہاں یہ اچھی خاصی تعداد میں رہ رہے ہیں۔ ایک اندازے کے مطابق ان کی تعداد 10 ہزار سے زیادہ ہو گی‘۔