امریکی ڈپٹی اسسٹنٹ سیکریٹری آف اسٹیٹ ایلس ویلز نے کہا ہےکہ ہم پاکستان کے ساتھ اپنے تعلقات میں یقینی بہتری دیکھتے ہیں۔

امریکی ڈپٹی اسسٹنٹ سیکریٹری آف اسٹیٹ برائے جنوبی و ایشیائی امور ایلس ویلز نے ایک خصوصی بریفنگ میں کہا ہےکہ ہم پاکستان کے ساتھ اپنے تعلقات میں یقینی بہتری دیکھتے ہیں۔

امریکی ڈپٹی اسسٹنٹ سیکریٹری آف اسٹیٹ نے واضاحت کی کہ پاک امریکا تعلقات میں بہتری ڈیووس میں صدر ڈونلڈ ٹرمپ کی  پاکستانی وزیر اعظم عمران خان کے ساتھ اعلی سطح کی پرجوش اور مثبت ملاقات  مین واضح طور پر دیکھی جا سکتی ہے ۔

انہوں نے مزید بتایا کہ پاکستان میں اقتصادی شراکت داری کے ان شعبوں  میں ،جہاں امریکا پاکستان کی بڑی برآمدی منڈی ہے اور تاریخی  سرمایہ کار میں بہتری پر بھی بات چیت ہوئی ہے۔

ایلس ویلز نے پاکستان کی جانب سےدہشت گردی کے مالی وسائل کے انسداد کےلیے اپنی ذمہ داریوں کی ادائیگی کو خوش آئند قرار دیا ہے۔

سی پیک پر ایلس ویلز کے بیان پر پاکستان کا ردعمل

امریکی ڈپٹی اسسٹنٹ سیکریٹری آف اسٹیٹ نے کہا کہ ہم پاکستان کےایف اے ٹی ایف ایکشن پلان کے تحت وعدوں پر عملدرآمد کے لیے ایف اے ٹی ایف اور عالمی برادری کے ساتھ مل کر کام کرنے کی حوصلہ افزائی کرتے ہیں ۔

انہوں نے مزید کہا کہ پاکستان کے لیے ایف اے ٹی ایف ایکشن پلان کی  تکمیل   آئی ایم ایف پروگرام اور اقتصادی اصلاحات کی کوششوں کے لیے ضروری ہے ۔

ایلس ویلز کا کہنا تھا کہ ایف اے ٹی ایف ایکشن پلان کی  تکمیل پاکستان میں عسکریت پسند گروپوں کے خلاف مستقل و بلا امتیاز کارروائی کے لیے بھی اہم ہے ۔

امریکی ڈپٹی اسسٹنٹ سیکریٹری آف اسٹیٹ نے کہا کہ افغان مفاہمتی عمل میں پیش رفت کے حوالے سے پاکستانی اقدامات کو سراہتے ہیں ۔افغانستان میں مستقل سلامتی اور استحکام کے لیے پاکستان اہم قوت رکھتا ہے ۔

 ایلس ویلز نے غیر ملکی سفارت کاروں کے حالیہ دورہ کشمیر کو مفید اقدام قرار دیتے ہوئے کہا کہ مودی حکومت ہمارے سفارت کاروں کو کشمیر تک مسلسل رسائی دے۔