مقبوضہ کشمیر میں بھارتی فوج نے ریاستی دہشت گردی کی تازہ کارروائی میں  مزید  دو کشمیری نوجوانوں کو شہید  کردیا ہے۔

کشمیر میڈیا سروس  کے مطابق مقبوضہ کشمیر  کے ضلع پلوامہ میں   بھارتی فوجیوں نے ریاستی دہشت گردی کی تازہ کارروائی میں  مزید دو کشمیری نوجوانوں کو شہید کردیا ہے۔

دونوں نوجوان ضلع  پلوامہ کے علاقے آونتی پورہ میں ہندوستانی سنٹرل ریزرو پولیس فورس ، راشٹریہ رائفلز اور ہندوستانی فوج کے خصوصی آپریشن گروپ کی جانب سے کیے گئے کورڈن اور سرچ آپریشن کے دوران شہید ہوئے۔

مقبوضہ کشمیر میں تازہ ترین شہادتوں کے بعد گذشتہ 48 گھنٹوں کے دوران شہید  ہونے والے نوجوانوں کی تعداد 5 ہو گئی ہے۔

اس سے قبل اسی علاقے میں  ہونےو الےایک حملے میں دو ہندوستانی فوجی بھی شدید زخمی ہوگئے تھے۔ آخری اطلاعات آنے تک سرچ  آپریشن جاری تھا۔

واضح رہے کہ  گذشتہ روز مقبوضہ کشمیر میں بھارتی فوج نے نام نہاد سرچ آپریشن کے دوران فائرنگ کر کے 3 کشمیری نوجوانوں کو شہید کر دیا تھا۔

آزاد جموں و کشمیر کے سابق وزرائے اعظم کی وزیراعظم سے ملاقات

جنت نظیر وادی کے ضلع شوپیاں میں مسلح قابض بھارتی فوج نے داخلی اور خارجی راستوں کو بند کر کے سرچ آپریشن کے نام پر چادر اور چار دیواری کے تقدس کو پامال کرتے ہوئے گھر گھر تلاشی  بھی لی تھی ۔

سرچ آپریشن کے دوران جارحیت پسند بھارتی فوج نے ایک مکان کو بارودی مواد سے تباہ کردیا  تھا جب کہ اندھا دھند فائرنگ کرکے 3 کشمیری نوجوانوں کو شہید کردیا تھا ۔

 جنگی جنون میں مبتلا قابض  بھارتی فوج نے  شہدا ءکی لاشیں بھی لواحقین کے حوالے نہیں کیں تھیں۔

مودی سرکار کی کٹھ پتلی انتظامیہ نے روایتی ہٹ دھرمی کا مظاہرہ کرتے ہوئے نوجوانوں کو دہشت گرد ثابت کرنے کی ناکام کوشش کی تاہم ہر بار کی طرح اس بار بھی بھارتی فوج کے جھوٹ کا پردہ فاش ہوگیا۔

غیور کشمیری عوام نے نوجوانوں کی شہادت پر شدید احتجاج کرتے ہوئے ضلع کی مرکزی شاہراہ کو بند کر کےقابض بھارتی فوج  کے خلاف شدید نعرے بازی  کی تھی ۔