سعودی مفتی الشیخ عبدالعزیز آل الشیخ نے تراویح اور نماز عید سے متعلق بڑا اعلان کردیا۔

عرب  میڈیا کی رپورٹ کے مطابق مفتی الشیخ عبدالعزیز آل الشیخ نےکہا ہے کہ اگر کورونا وائرس کی وبا ءاسی طرح جاری رہی تو نماز تراویح اور عید الفطر گھروں ہی میں ادا کی جائے گی۔

رمضان المبارک کی آمد  اور کورونا وائرس کی وباء سے متعلق امور اسلامی اور دعوت وارشاد کی وزارت سے پوچھے گئے سوالوں کے جواب میں الشیخ عبدالعزیز آل الشیخ نے اس بات کا اعلان کیا۔

انہوں نے کہا کہ کورونا وائرس کے پھیلاؤ کو روکنے کے لیے متعلقہ حکام کے فیصلے کے مطابق اس سال رمضان المبارک کی تروایح فرزندان توحید گھروں میں ادا کریں۔

 عیدالفطر کی نماز سے متعلق ایک سوال کا جواب دیتے ہوئے الشیخ عبدالعزیز آل الشیخ کا کہنا تھا کہ اگر  کورونا  کی وباء کے پیش نظر نماز عید کھلی جگہوں اور مساجد میں ادا نہ کی جا سکی تو خطبہ کے بغیر لوگ اسے گھروں میں ادا کریں۔

واضح رہے کہ دنیا بھر میں کورونا کی عالمی وباء کے باعث تمام ، معاشی ، سماجی، اقتصادی نظام زندگی سمیت  مذہبی عبادت گاہیں   بھی بند ہیں۔