ملک بھر میں رواں سال حج کیلئے مقامی عازمین کے لئے حج درخواستوں کی وصولی آج سے شروع ہوگئی۔

سعودی وزارت حج و عمرہ کی جانب سے جاری بیان کے مطابق وہ مقامی شہری جنہوں نے کبھی حج نہیں کیا اس سال صرف ان کو حج کی اجازت ہوگی جبکہ کامیاب افراد کے ناموں کا اعلان 12 جولائی کو کیا جائے گا۔

سعودی وزارت حج نے اپنے بیان میں مزید کہا کہ مقامی افراد اور اقامہ ہولڈرز ہی صرف حج درخواستیں جمع کرا سکیں گے جبکہ سیاح، کاروباری افراد اور فیملی ویزے پر آئے افراد حج درخواستیں جمع نہیں کرا سکیں گے۔

دوسری جانب مکہ مکرمہ کے گورنر شہزادہ خالد الفیصل بن عبدالعزیز کی جانب سےحج 2020 سے متعلق صحت ضوابط جاری کردیے گئے۔

بین الاقوامی میڈیا کے مطابق  حج کرانے والوں کوحفاظتی ماسک اوردستانے پہننا ہوں گے،28 ذی القعدہ سے12ذی الحجہ تک منی، مزدلفہ،عرفات میں بغیراجازت جانامنع ہوگا۔

رواں سال حج 2020 کیسے ہوگا؟ ضوابط جاری

حج ضوابط کے مطابق آب زمزم کے کولرز کے پاس جمع ہونا منع ہوگا تاہم پانی پینے یا زمزم کیلیے ڈسپوزیبل بوتلیں،ڈبےاستعمال کیے جائیں گے، حاجی حضرات کو بند پیکٹوں والے کھانے پیش کیے جائیں گے اور کھانے پینے کے برتن دوبارہ استعمال کرنے کی اجازت نہیں ہوگی جبکہ مسجد الحرام میں کھانے کی اشیا لانے پر پابندی اور خارجی صحنوں میں کھانے کی اجازت نہیں ہوگی۔

ضوابط  کے تحت  خانہ کعبہ یا حجراسود کو چھونا منع ہوگا، صفا و مروہ کی سعی ہر منزل سے ہوگی،سعی کے دوران سماجی فاصلے کی پابندی کرنا ہوگی اور طواف کی جگہ صفا ومروہ کے علاقے کو حاجیوں کے ہر کارواں کے بعد سینیٹائز کیا جائے گا جبکہ جمرات کی رمی کے لیے پیک شدہ کنکریاں فراہم کی جائیں گی۔