امریکی صدر ٹرمپ کی اہلیہ کے ساتھ کیپیٹل حملے کی لائیو کوریج انجوائے کرنے کی ویڈیو منظر عام پر آگئی ہے۔

وائرل ہوئی ویڈیو میں دیکھا جاسکتا ہے کہ اہلخانہ اور دوستوں کے ہمراہ موسیقی کے شور میں صدر ٹرمپ اپنے حامیوں کا پارلیمنٹ پر دھاوا اور توڑ پھوڑ ٹی وی اسکرینز پر براہ راست دیکھ رہے ہیں جبکہ اس موقع پر موجود خواتین و دیگر لوگ موسیقی پر رقص بھی کرتے نظر آرہے ہیں۔

اپنے حامیوں کو کشیدگی پھیلانے پر آمادہ کرنے اور اکسانے والے ٹرمپ خود اس منظر سے بھر پور لطف اُٹھاتے رہے۔

دوسری جانب سماجی رابطے کی ویب سائٹ ٹویٹر کی جانب سے بدھ کے روز امریکی کانگرس پر حملے اور ’ غیر ذمہ دارانہ ‘ ٹویٹس کے پیش نظر امریکی صدر ڈونلڈ ٹرمپ کا اکاﺅنٹ مستقل بنیادوں پر معطل کر دیاگیا ہے۔

بین الاقوامی میڈیا کے مطابق ٹویٹر انتظامیہ کی جانب سے یہ فیصلہ کیپٹل ہل میں مزید اشتعال انگیزی کو روکنے کیلئے کیا گیاہے ۔

ٹوئٹر نے امریکی صدر ڈونلڈ ٹرمپ کا ٹوئٹر اکاونٹ مستقل طور پر بند کرنے کا اعلان کرتے ہوئے کہا ہے کہ ایسا تشدد پر مزید اکسائے جانے کے خطرے کے پیشِ نظر کیا گیا ہے۔

 ٹوئٹر کا کہنا ہے کہ یہ فیصلہ ڈونلڈ ٹرمپ کی جانب سے کی جانے والی حالیہ ٹوئٹس اور سیاق و سباق کا بغور جائزہ لینے کے بعد کیا گیا ہے۔

یہاں یہ امر قابل ذکر ہے کہ بدھ کے روز ٹرمپ کے اپنے حمایتوں کیلئے پیغامات پر ٹویٹ کی جانب سے ان کا اکاﺅنٹ بارہ گھنٹوں کیلئے معطل کیا گیا تھا اور ٹویٹر انتظامیہ کی جانب سے متنبہ کیا گیا تھا کہ اگر ٹرمپ کی جانب سے اس پلیٹ فارم کے قواعد کی پھر سے خلاف ورزی کی گئی تو ان پر یہ پابندی مستقل طور پرعائد کر دی جائے گی۔

خیال رہے کہ بدھ کو امریکی صدر ٹرمپ کی جانب سے متعدد ٹوئٹس کی گئی تھیں جن میں انھوں نے کیپیٹل ہل پر حملہ کرنے والے لوگوں کو محبِ وطن کہہ کر پکارا تھا۔جمعرات کو فیس بک نے کہا تھا کہ وہ غیر معینہ مدت تک کے لیے ڈونلڈ ٹرمپ کا اکاونٹ معطل کر رہی ہے۔