کورونا کیسز میں کمی کے بعد امریکا نے پاکستان سمیت چھ ممالک کے لیے سفری پابندیاں مزید آسان کر دی ہیں۔

غیر ملکی خبر رساں ادارے کے مطابق یو ایس سینٹرز فار ڈیزیز کنٹرول اینڈ پریوینشن (سی ڈی سی) نے پاکستان، بھارت، جاپان، لائبیریا، گیمبیا اور موزمبیق کے لیے اپنی کوویڈ 19 کے سفری خطرے کی ایڈوائزری کو “لیول ون: لو” کر دیا ہے۔

سی ڈی سی نے اپنی تازہ ترین ایڈوائزری میں چیک ریپبلک، ہنگری اور آئس لینڈ کے لیے سفر کرنے کے خلاف بھی مشورہ دیا ہے جس کی وجہ ان ممالک میں کوویڈ 19 کے بڑھتے ہوئے کیسز ہیں۔

سی ڈی سی نے تینوں ممالک کے لیے اپنی سفری سفارشات کو “لیول فور: بہت زیادہ” تک بڑھا دیا ہے جبکہ امریکیوں سے کہا گیا ہے کہ وہ وہاں سفر کرنے سے گریز کریں۔

رواں سال اگست میں سی ڈی سی نے پاکستان کے لیے “لیول 2 ٹریول ہیلتھ نوٹس” جاری کیا تھا جو ملک میں کووِڈ 19 کی معتدل لیول کی نشاندہی کرتا ہے۔

پاکستان میں گزشتہ ہفتہ کے روز اب تک کی سب سے کم مثبت کیسز کی شرح 0.78 ریکارڈ کی گئی تھی اور کیسز کی تعداد میں بھی روز بروز کمی دیکھی جارہی ہے جبکہ اس سے 14 ماہ قبل 30 اگست 2020 کو ملک میں 213 کیسز رپورٹ ہوئے تھے۔

اسی طرح گزشتہ سال مارچ میں متعلقہ حکام کی جانب سے انفیکشن کی شرح کی پیمائش شروع کرنے کے بعد سے ہفتہ کو مثبت  کیسز کی شرح اب تک کی سب سے کم ریکارڈ کی گئی ہے۔

پاکستان میں مسلسل چوتھے دن کورونا وائرس کے 300 سے کم کیسز ریکارڈ کیے گئے، آج یہ تعداد 216 رہی جبکہ مثبت کیسز کی شرح مزید گر کر 0.63 پر آ گئی ہے۔

نیشنل کمانڈ اینڈ کنٹرول سینٹر کے مطابق گزشتہ 24 گھنٹوں کے دروان 33 ہزار 435 ٹیسٹ کیے گئے۔

ملک بھر میں کورونا کیسز کی کل تعداد 12 لاکھ 80 ہزار 92 ہوگئی ہے جبکہ اموات کی تعداد 28 ہزار 618 ہوگئی ہے۔