دیو ہیکل برفانی تودہ A68 جس کا رقبہ 6000 مربع کلومیٹر یا 2300 اسکوائر میل تھا، جولائی 2017ء میں انٹارکٹیکا (قطب جنوبی) سے ٹوٹ کر الگ ہوا تھا اور 2021ء تک اِس تودے کا نام و نشان بھی مٹ چکا تھا۔

یہ برفانی تودہ جب پگھلنا شروع ہوا تو روزانہ کی بنیاد پر سمندر میں تقریباً ڈیڑھ ارب ٹن سے زیادہ تازہ پانی کا اضافہ کر رہا تھا۔

لیڈز یونیورسٹی کی ایک ٹیم سیٹلائٹ سے اکٹھے کیے گئے ڈیٹا کی مدد سے اس دیوہیکل برفانی تودے کے تمام سفر کا جائزہ لے چکی ہے جس کے دوران ایک ٹریلین ٹن برف کا یہ متحرک اور لمحہ بہ لمحہ سُکڑتا جزیرہ انٹارکٹیکا سے رخ بدلتا ہوا بحر منجمد جنوبی سے گزرا اور شمال کی جانب جاتے جاتے بحر اوقیانوس جنوبی میں اُتر گیا۔

لیڈز یونیورسٹی کی ٹیم نے ڈیٹا کی مدد سے یہ بھی معلوم کیا ہے کہ اس جائنٹ آئس برگ کے سفر میں ساڑھے تین سال کے دوران برف کس رفتار سے پگھل رہی تھی۔ اس سفر کا سب سے اہم اور آخری حصہ وہ تھا جب A68 نامی تودہ برطانوی جنوبی جارجیا کے گرم پانیوں میں داخل ہو رہا تھا۔

لیڈز یونیورسٹی کی ڈاکٹر این براکمین نے برطانوی نشریاتی ادارے بی بی سی کو بتایا کہ ایسا لگتا ہے کہ جیسے جیسے A68 خشکی کے قریب آ رہا تھا اس نے کچھ دیر کے لیے سمندر کی تہہ کو بھی چھوا۔

ڈاکٹر این براکمین کے ساتھی محقق پروفیسر انڈریو شیفرڈ کے مطابق اس میگا برگ کی موٹائی بھی کم ہو رہی تھی جو 150 میٹر سے لے کر 141 میٹر تک تھی۔

اپریل 2021ء تک A68 نامی یہ برفانی تودہ بے شمار چھوٹے چھوٹے ٹکڑوں میں بٹ چکا تھا لیکن اس تودے کے ماحولیاتی اثرات بہت دیر تک باقی رہیں گے۔

برطانوی انٹارکٹک سروے نے  A68کے مکمل خاتمے سے قبل اس کی سطح پر نمودار ہونے والی تبدیلیاں دیکھنے کے لیے روبوٹ گلائیڈرز بھی استعمال کیے۔

ماہر علمِ بحریات پروفیسر جیرانٹ ٹارلنگ کہتے ہیں کہ ابھی اس ڈیٹا کو مکمل طور پر جانچا تو نہیں جا سکا لیکن یہ واضح ہے کہ سمندی نباتات خصوصا فائٹوپلینکٹن اسپیشیز میں واضح تبدیلی آ رہی تھی جس کی وجہ اس برفانی تودے سے خارج ہونے والا حیاتیاتی مواد تھا۔