سری نگر: دنیا بھر میں بسنے والے کشمیری آج بھارت کے یوم جمہوریہ کے موقع پر یوم سیاہ منارہے ہیں۔

کشمیر میڈیا سروس کی رپورٹ کے مطابق مقبوضہ کشمیر سمیت دنیا بھر میں بسنے والے کشمیری آج یوم سیاہ منارہے ہیں جبکہ س دن کو منانے کا مقصد بھارت کی طرف سے کشمیریوں کے حق خود ارادیت سے مسلسل انکار کے خلاف اپنا احتجاج ریکارڈ کرانا ہے۔

اس دن کو منانے کا مقصد یہ بھی ہے کہ عالمی برادری کو یہ پیغام دیا جائے کہ کشمیریوں کے تمام حقوق سلب کرنے والے بھارت کو اپنا یوم جمہوریہ منانے کا کوئی حق حاصل نہیں ہے۔

اس دن کو منانے کی کال غیر قانونی طور پر نظر بند چیئرمین مسرت عالم بٹ اور دیگر رہنماؤں نے دی ہے جبکہ اس کی حمایت کا اعلان حریت رہنماؤں کی جانب سے بھی کیا گیا ہے۔

بھارت کے یوم جمہوریہ کے موقع پر مقبوضہ کشمیر فوجی چھاؤنی میں تبدیل ہوگیا ہے جبکہ وادی میں انٹرنیٹ سروس بھی معطل ہے۔

کشمیری عوام سے اظہار یکجہتی اور ان کی مکمل حمایت میں مختلف ممالک کے دارالحکومتوں میں آج ریلیاں اور مظاہرے کیے جارہے ہیں تاکہ عالمی برادری کی توجہ مقبوضہ کشمیر میں بھارتی ریاستی دہشتگردی کی جانب مبذول کروائی جائے۔

دوسری جانب قابض بھارت حکومت کی آلہ کار انتظامیہ کی جانب سے وادی میں 26 جنوری ’یوم جمہوریہ‘ کی مرکزی تقریبوں کا اہتمام کیا گیا ہے اور بھاری تعداد میں فوجیوں کو بھی تقریب کی جگہ تعینات کیا گیا ہے۔

رپورٹ کے مطابق انتظامیہ کی جانب سے بلند عمارتوں پر ماہر نشانہ باز تعینات کیے گئے ہیں جبکہ بھارت مخالف مظاہروں کو روکنے کے لیے مختلف علاقوں میں نئے بنکرز اور رکاوٹیں بھی کھڑی کی گئی ہیں۔

رپورٹ کے مطابق ناکوں پر موجود بھارتی فوجیوں نے کشمیریوں کا رہنا دشوار کردیا ہے اور ان کی سخت تلاشی لی جارہی ہے جبکہ بھارتی فوج اچانک گھروں کی تلاشی بھی لے رہی ہے۔