کابل: افغانستان کا دارالحکومت عید الفطر کے دن بھی دہشتگردوں سے محفوظ نہ رہ سکا اور اس مرتبہ دہشتگروں نے بس کو نشانہ بنایا ہے۔

غیر ملکی خبر رساں ادارے کے مطابق افغانستان کے دارالحکومت کابل میں عیدالفطر کے دن بس میں دھماکہ ہوا جس کے نتیجے میں ایک خاتون جاں بحق ہوگئی ہیں۔

دھماکے میں تین افراد زخمی بھی ہوئے ہیں جبکہ حملے کی ذمہ داری کالعدم داعش نے قبول کرلی ہے۔

واضح رہے کہ افغانستان میں رمضان المبارک کے وسط اور آخری عشرے میں ہونے والے بم دھماکوں میں درجنوں افراد جاں بحق اور متعدد زخمی ہوئے ہیں۔

اس سے قبل بروز جمعہ کو کابل کی مسجد میں دھماکہ ہوا تھا جس کے نتیجے میں 50 سے زائد نمازی شہید ہوگئے تھے جبکہ اس حملے کی ذمہ داری کسی گروہ نے قبول نہیں کی تھی۔

مسجد میں ہونے والے دھماکے کی اقوام متحدہ اور اسلامی تاون تنظٰیم (او آئی سی) نے شدید مذمت کی تھی۔

او آئی سی کے جنرل سیکرٹریٹ کا کہنا تھا کہ اندھا دھند اور بار بار حملے افغانستان میں سیکیورٹی کی غیر مستحکم صورت حال کی نشاندہی کرتے ہیں۔

دوسری جانب طالبان حکام کا موقف ہے کہ انہوں نے داعش کو شکست دے دی ہے لیکن ماہرین کہتے ہیں کہ کابل حکومت کے لیے جہادی گروہ اب بھی سب سے بڑا سیکیورٹی چیلنج ہیں۔