بھارتی ریاست راجستھان کے باڑمیر میں بھارتی ائیر فورس کا مگ 21 طیارہ تربیتی پرواز کے دوران گر کر تباہ ہو گیا، حادثے میں دونوں پائلٹ بھی ہلاک ہو گئے۔

تفصیلات کے مطابق انڈین ائیر فورس کا دو نشستوں والا مگ 21  ٹرینر طیارہ آج شام راجستھان کے اترلائی ایئر بیس سے ٹریننگ سورٹی کے لیے  جا رہا تھا۔

بھارتی فضائیہ کے مطابق تقریباً 9:10 بجے ہوائی جہاز کو بارمیر کے قریب حادثہ پیش آیا، جس کے نتیجے میں دونوں پائلٹ ہلاک ہو گئے۔

بھارتی فضائیہ نے پائلٹوں کی جانوں کے ضیاع پر افسوس کیا اور کہا کہ سوگوار خاندانوں کے ساتھ مضبوطی سے کھڑے ہیں۔

انڈین ائیر فورس حکام نے حادثے کی وجہ معلوم کرنے کے لیے کورٹ آف انکوائری کا حکم دے دیا ہے۔

واضح رہے کہ مگ 21  سوویت دور کا ایک واحد انجن والا ملٹی رول لڑاکا/ زمینی حملہ کرنے والا طیارہ ہے جو انڈین ائیر فورس کے بیڑے کی ریڑھ کی ہڈی کی حیثیت رکھتا ہے۔

روسی ساختہ یہ طیارہ اسے پہلی بار 1960 کی دہائی میں ہندوستان-چین جنگ کے بعد بھارتی فضائیہ میں شامل کیا گیا تھا اور 2006 میں مگ 21 بائیسن ورژن میں اپ گریڈ کیا گیا تھا۔

اپ گریڈ میں طاقتور ملٹی موڈ ریڈار، بہتر ایونکس اور کمیونیکیشن سسٹم شامل تھے۔ اگرچہ یہ جیٹ طیارے ابتدائی طور پر صرف سادہ بم لے جا سکتے تھے، لیکن اب یہ گائیڈڈ گولہ بارود کی ایک وسیع رینج لے جانے کی صلاحیت رکھتے ہیں۔

یاد رہے کہ ماضی میں بھی بھارتی فضائیہ کے روسی ساختہ مگ 21 طیارے متعدد مرتبہ گر کر تباہ ہو چکے ہیں۔