چین کی جنگی مشقوں کے باعث بعض فضائی کمپنیوں نے تائی پے اور ملحقہ ملکوں کے لیے پروازیں بند کردی ہیں۔

غیر ملکی خبر رساں ادارے کے مطابق امریکی ایوانِ نمائندگان کی اسپیکر نینسی پلوسی کے دورہ تائیوان کے بعد چین نے تائیوان کے قریب سمندر اور فضا میں فوجی مشقیں شروع کردی ہیں۔

رپورٹ کے مطابق فوجی مشقوں کے باعث بعض ایئر لائنز نے تائیوان کے دارالحکومت اور ملحقہ شہروں کے لیے پروازیں بند کردی ہیں۔

سنگاپور کی ایئر لائن کا کہنا ہے کہ ایئر اسپیس میں بڑھتی رکاوٹ کے باعث اس نے جمعے کو سنگاپور اور تائی پے کے درمیان پروازوں کو بند کردیا ہے۔

ان کا کہنا تھا کہ ہم صورت حال کا بغور جائزہ لے کر ہی اگلا لائحہ عمل طے کریں گے۔

کورین ایئر لائنز نے بھی سیئول اور تائی پے کے درمیان جمعہ اور ہفتے کو پروازیں بند کرنے کا اعلان کیا ہے جبکہ پروازوں کی بحالی اتوار کو دیر سے کی جائے گی۔

دوسری جانب نینسی پلوسی جو آج کل ایشیائی ممالک کے دورے پر ہیں، انہوں نے جمعے کو جاپان کے شہر ٹوکیو میں صحافیوں سے گفتگو کی جس میں ان کا کہنا تھا کہ امریکہ تائیوان کو تنہا نہیں چھوڑے گا اور چین کو اسے تنہائی کا شکار کرنے کی اجازت نہیں دیں گے۔

نینسی پلوسی کا اپنا دورہ تائیوان کے حوالے سے کہنا تھا کہ ہمارے حکام پہلے بھی دورے کرتے رہے ہیں اور آئندہ بھی دورے کرتے رہیں گے۔

انہوں نے کہا کہ دوسرے ممالک کی طرح تائیوان کا دورہ بھی خطے میں اسٹیٹس کو تبدیل کرنے کے لیے نہیں ہے، یہ تائیوان ریلیشنز ایکٹ، امریکہ چین پالیسی اور اس کے ضمن میں قانون سازی اور معاہدوں سے متعلق ہے۔

ان کا کہنا تھا اس دورے کا مقصد آبنائے تائیوان میں امن قائم کرنے اور اسٹیٹس کو برقرار رکھنا ہے۔

واضح رہے کہ چینی انتباہ کی پرواہ کیے بغیر نینسی پلوسی نے تائیوان کا دورہ کیا ہے جبکہ گذشتہ 25 سالوں میں یہ پہلا موقع ہے کہ جب امریکی عہدیدار نے تائیوان کا دورہ کیا ہے۔

یاد رہے کہ چین نے واضح الفاظ میں دھمکی دی تھی کہ اگر امریکی ایوانِ نمائندگان کی اسپیکر نے تائیوان کا دورہ کیا تو چین کی فوج ہاتھ پر ہاتھ دھرے نہیں بیٹھی رہے گی۔