سری نگر: مقبوضہ کشمیر میں بھارتی یوم آزادی کو آج یوم سیاہ کے طور پر منایا جارہا ہے۔

مقبوضہ کشمیر میں آج بھارت کے یوم آزادی کے موقع پر ناجائز قبضے اور مظالم کے خلاف احتجاجی ریلیاں نکالی جائیں گی۔

اس موقع پر بھارت کے غیر قانونی طور پر زیر قبضہ جموں و کشمیر کے مختلف علاقوں میں  یوم سیاہ کے حوالے سے پوسٹرچسپاں کیے گئے ہیں۔

پندرہ اگست کوبھارت کے یوم آزادی کو یوم سیاہ کے طور پر منایا جانا تحریر درج ہے جب کہ بھارتی ناجائز قبضے کے خلاف آزاد کشمیر میں بھی احتجاجی ریلیاں نکالی جائیں گی۔

اسلام آباد میں آل پارٹیز حریت کانفرنس بھارتی ہائی کمیشن کے سامنے احتجاجی مظاہرہ کریں گی جب کہ نیشنل پریس کلب کے باہر بھی مقبوضہ کشمیر میں بھارتی ناجائز قبضہ کے خلاف احتجاجی مظاہرہ ہوگا۔

دنیا بھر میں مقیم کشمیری آج بھارتی یوم آزادی کو یوم سیاہ کے طور پر منائیں گے اور کشمیری بھارتی مظالم کے خلاف احتجاجی مظاہرے کریں گے۔

حریت رہنما عبدالحمید لون کہتے ہیں بھارتی ناجائز قبضہ کے خلاف کشمیری سیاہ جھنڈے لہرا کر بھارت سے نفرت کا اظہار کررہے ہیں۔

ان کا کہنا ہے کہ مقبوضہ جموں و کشمیر پر بھارت کا 75 سال سے غیر قانونی قبضہ ہے، یومِ سیاہ منا کر بھارت اور عالمی دنیا کو پیغام دینا ہے کہ کشمیریوں نے بھارت کو تسلیم نہیں کیا ہے۔

عبدالحمید لون کا کہنا تھا کہ بھارتی فوج نے وادیِ کشمیر کو فوجی چھاؤنی میں تبدیل کردیا ہے اور بھارتی فوج نے سرچ آپریشن کے نام پر کشمیریوں کا جینا حرام کر رکھا ہے۔

انہوں نے کہا کہ بھارتی فوج نے چیکنگ اور جامع تلاشی کا سلسلہ تیز کردیا ہے جب کہ بھارتی فورسز نے سری نگر کو مکمل طور پر فوجی چھاؤنی بنا دیا ہے۔

حریت رہنما کا کہنا تھا کہ سری نگر بخشی اسٹیڈیم کے اِرد گرد بھارتی قابض افواج کی بھاری نفری تعینات کردی گئی ہے، مقبوضہ کشمیر میں ہر جگہ بنکرز اور رکاوٹیں کھڑی کردی ہیں۔

عبدالحمید لون نے کہا کہ مقبوضہ کشمیر میں ڈرون کیمروں سے  لوگوں کی نقل و حرکت پر نظر رکھی جارہی ہے، کشمیریوں کے کاروبار کو تباہ اور انسانی حقوق کو سلب کرلیا گیا ہے۔

وادی کشمیر میں بھارتی قابض افواج نے خوف و دہشت کا ماحول قائم کیا ہوا ہے جب کہ مقبوضہ کشمیر میں آج مکمل طور پر ہڑتال ہے۔

دوسری جانب 14 اگست پاکستان کے جشنِ آزادی کے دن کے موقع پر مقبوضہ کشمیر میں کشمیریوں نے پاکستان کے ساتھ اظہار محبت کیا اور مقبوضہ کشمیر میں کئی مقامات پر پاکستانی پرچم لہرائے گئے۔

عبدالحمید لون کے مطابق پاکستان کے یوم آزادی والے دن کشمیری نوجوانوں نے پاکستانی پرچم کے ساتھ پاکستان زندہ باد کے نعرے لگائے جب کہ سری نگر اور جنوبی کشمیر میں نوجوانوں نے پاکستانی پرچم لہرائے ہیں۔

عبدالحمید لون کہتے ہیں بھارت بھر پور ریاستی دہشت گردی کے باوجود کشمیری مسلمانوں کے دلوں سے پاکستان کی محبت ختم نہیں کرسکا ہے، کشمیری قوم آج بھی قائد اعظم کے پاکستان کی تکمیل کی جنگ لڑ رہی ہے۔

انہوں نے کہا کہ پاکستان کے جشن آزادی کے موقع پر نوجوانوں نے آتش بازی کا بھی مظاہرہ کیا جب کہ کشمیری نوجوانوں نے مقبوضہ کشمیر میں کئی مقامات پر بھارتی پرچم کو نذر آتش بھی کیا ہے۔