انتہا پسند ہندوؤں کی فائرنگ سے ایک مسلم نوجوان ابراہیم پٹھان قتل ہوگیا ہے جس کے بعد ریاست راجھستان میں حالات کشیدہ ہوگئے ہیں۔

کشمیر میڈیا سروس کی رپورٹ کے مطابق بھارت کی ریاست راجھستان کے ضلع بھیلواڑہ میں انتہا پسند ہندو دہشت گردوں نے فائرنگ کرکے 34 سالہ ابراہیم پٹھان کو قتل جب کہ اس کے 22 سالہ بھائی قمر الدین کو زخمی کردیا ہے۔

مسلم نوجوان کے قتل کے بعد علاقے میں حالات کشیدہ ہوگئے ہیں جب کہ پولیس نے مسلم نوجوان کے قتل کے خلاف بڑے پیمانے پر احتجاج کے بعد ضلع میں انٹرنیٹ سروسز کو 48 گھنٹوں کے لیے بند کر دیا ہے۔

پولیس نے دعویٰ کیا ہے کہ مسلم نوجوان کے قتل میں ملوث دو ملزمان کو گرفتار کرلیا گیا ہے جب کہ پولیس کے مطابق دو موٹر سائیکلوں پر سوار چار دہشت گردوں نے مسلم نوجوان کو گولی مارکر قتل کیا ہے۔

رپورٹ کے مطابق اسسٹنٹ سپرنٹنڈنٹ پولیس جیش تھامیتری نے میڈیا کو بتایا کہ دو بھائی ابراہیم پٹھان اورقمر الدین بھیلواڑہ کے بدلہ چوک سے ہرنی مہادیو کی طرف جارہے تھے کہ اچانک چار ہندوتوا غنڈوں نے جو موٹرسائیکلوں پر سوار تھے ابراہیم اور قمر الدین پرفائرنگ شروع کردی۔

انہوں نے مزید کہا کہ ابراہیم اور اوراس کے بھائی گولیاں لگنے سے زخمی ہوئے، بعد ازاں ابراہیم زخموں کی تاب نہ لاتے ہوئے جاں بحق ہوگئے۔