بھارتی ریاست مہارشٹرا میں ایک انوکھا واقعہ پیش آیا ہے، جہاں ایک باپ نے ٹی وی پروگرام ’سی آئی ڈی‘ سے متاثر ہوکر اپنی بیٹی کو قتل کردیا۔

بھارتی میڈیا کے مطابق ریاست مہارشٹرا کے شہر ناگپور میں پولیس نے ایک شخص کر گرفتار کیا ہے جس نے مبینہ طور پر اپنی بیوی کو سبق سکھانے کے لیے 16 سالہ بیٹی کو قتل کیا ہے۔

رپورٹ کے مطابق ملزم نے قتل کرنے کے بعد موت کو خودکشی کا رنگ دینے کی کوشش کی جس میں وہ ناکام رہا اور پکڑا گیا۔

پولیس کے مطابق ملزم گڈو چھوٹے لال راجک نے پہلی بیوی کی خودکشی کے بعد دوسری شادی کوشلیا نامی خاتون سے کررکھی تھی جب کہ پہلی بیوی سے اس کے تین بچے تھے۔

پولیس کا کہنا ہے کہ دوسری بیوی تنگ آکر گھر چھوڑ گئی تھی جس کو سبق سکھانے کے لیے ملزم نے اتنا بڑا قدم اٹھایا۔

پولیس کے مطابق 16 سالہ ماہی کی لاش 6 نومبر کو چھت سے لٹکی ہوئی ملی تھی جب کہ پولیس کو خودکشی سے قبل لکھے گئے 5 خط بھی ملے تھے۔

پولیس اسٹیشن کے انچارج نے بتایا کہ خط میں لڑکی نے اپنی سوتیلی ماں، ماموں، خالہ اور دادا پر زبردستی شادی کرنے کا الزام لگایا تھا جب کہ خط میں ماموں پر ہراسانی کا الزام بھی لگایا گیا تھا۔

پولیس کا بتانا ہے کہ ملزم نے اپنی بیوی اور رشتہ داروں کو سبق سکھانے کے لیے یہ منصوبہ بنایا تھا جب کہ اس نے اس سب کے لیے ٹی وی پروگرام سی آئی ڈی سے آئیڈیا لیا تھا۔

پولیس کا مزید کہنا تھا کہ ملزم نے تصویر کھینچنے کا بہانہ بناکر بیٹی کو میز پر چڑھایا جس کے بعد بیٹے نے تصویر لی اور پھر گڈو نے میز کو ٹانگ ماردی۔

انہوں نے بتایا کہ جب پولیس کو ملزم پر شک ہوا اور اس کا موبائل تفتیش کے لیے لیا تو ملزم نے قتل کا اعتراف کرلیا۔