دنیا کی  مجموعی آبادی 8 ارب سے تجاوز کر گئی۔

اقوام متحدہ کی جانب سے جاری کردہ رپورٹ کے مطابق 15 نومبر بروز منگل کو دنیا کی آبادی 8 ارب سے ہو گئی ہے۔

رپورٹ میں دنیا کی آبادی 8 ارب پہنچ جانے کو انسانی ترقی کی راہ میں ایک اہم سنگ میل قرار دیا گیا ہے  ۔

اقوام متحدہ کی رپورٹ میں کہا گیا ہے کہ  عالمی آبادی  1950 کے بعد سے اب تک کی اپنی سست ترین شرح سے آگے بڑھ رہی ہے،  جو 2020 میں ایک فیصد سے کم ہو گئی ہے۔

رپورٹ میں بتایا گیا ہے کہ عالمی آبادی کو 7 ارب سے بڑھ کر 8 ارب ہونے میں 12  سال لگے  جبکہ آبادی  کے 9 ارب  تک پہنچنے میں تقریباً 15  سال لگیں گے۔

اس حساب سے  2037 تک دنیا کی آبادی 9 ارب ہو جائے گی جو کہ عالمی آبادی میں  اضافے کی شرح میں سست رفتاری  کی علامت ہے۔

اقوام متحدہ کے تازہ ترین تخمینے بتاتے ہیں کہ دنیا کی آبادی 2030 میں 8 ارب 50 کروڑ اور 2050 میں 9 ارب 70 کروڑ تک بڑھ سکتی ہے۔

اقوام متحدہ کی رپورٹ میں توقع  ظاہر کی گئی ہے کہ رواں صدی کے اختتام تک دنیا کی آبادی  10 ارب سے بھی تجاوز کرجائے گی۔

2080 کی دہائی کے دوران آبادی لگ بھگ 10 ارب 40 کروڑ افراد تک پہنچ سکتی ہے جو 2100 تک اسی  سطح پر رہنے کا امکان ہے۔

ورلڈ پاپولیشن پراسپیکٹس 2022  کے مطابق حالیہ دہائیوں میں بہت سے ممالک میں شرح پیدائش میں نمایاں کمی آئی ہے۔ اس وجہ کی بناء پر 2022 سے 2050 کے درمیان 61 ممالک یا علاقوں کی آبادی میں ایک فیصد یا اس سے زیادہ کمی متوقع ہے۔

2050 تک عالمی آبادی میں متوقع اضافے  کا نصف سے زیادہ آٹھ ممالک میں ہو گا جن میں کانگو، مصر، ایتھوپیا، بھارت، نائیجیریا، پاکستان، فلپائن اور تنزانیہ شامل ہیں۔

ورلڈ پاپولیشن پراسپیکٹس 2022 کے مطابق بھارت آئندہ برس چین کو پیچھے چھوڑ کر دنیا کا سب سے زیادہ آبادی والا ملک بن جائے گا۔

اقوام متحدہ کی رپورٹ کے مطابق چین کی موجودہ آبادی    ایک ارب 42 کروڑ  سے زائد جبکہ بھارت کی  اس سے صرف تھوڑی سی کم ایک ارب 41  کروڑ سے زائد ہے۔

رپورٹ میں مزید کہا گیا ہے کہ 2050 تک بھارت کی آبادی بڑھ کر ایک ارب 66 کروڑ سے زائد ہو جائے گی جبکہ چین کی آبادی کم ہوکر  ایک ارب 31 کروڑ تک رہ جائے گی۔

رپورٹ میں کہا گیا ہے کہ  پاکستان ان آٹھ ممالک میں سے ایک ہے جہاں 2050 تک دنیا کی آبادی کا نصف سے زیادہ مرکوز ہوگی۔   پاکستان میں دنیا کی مجموعی آبادی کا تقریباً تین فیصد ہے اور وہاں ایک عورت اوسطاً 3.6 بچے پیدا کرتی ہے۔