نئی دہلی: شردھا قتل کیس کے ملزم  آفتاب پونے والا نے عدالت میں قتل کا اعتراف کرلیا ہے۔

بھارتی میڈیا کے مطابق شردھا قتل کیس کے ملزم  آفتاب پونے والا کو وڈیو کانفرنس کے ذریعے عدالت میں پیش کیا گیا جس کے بعد عدالت نے ملزم کی پولیس کسٹڈی میں 4 روز کی توسیع کردی۔

بھارتی میڈیا کا کہنا ہے کہ شردھا قتل کیس کے ملزم  آفتاب پونے والا نے عدالت میں  قتل کا اعتراف  کرلیا ہے جب کہ ملزم پولیس سے تعاون بھی کر رہا ہے۔

میڈیا رپورٹس کے مطابق پولیس کو اتوار کو مہرولی  کے جنگلات سے شردھا کی مزید باقیات ملی ہیں، ملنے والی باقیات کو ڈی این اے ٹیسٹنگ کے لئے بھیج دیا گیا ہے۔

پولیس تاحال واردات میں استعمال کیے گئے آلات برآمد نہیں کر سکی ہے جب کہ شردھا کے جسم کا کچھ حصہ بھی برآمد نہیں کیا جا سکا ہے۔

دہلی پولیس کا کہنا ہے کہ اس واقعے کے وقت استعمال کیے گئے کپڑے بھی برآمد نہیں ہوسکے ہیں جب کہ شردھا کے فون کی تلاش بھی جاری ہے۔

واضح رہے کہ ملزم نے شردھا واکر کو مئی میں  قتل کیا تھا، ملزم نے قتل کے بعد لاش کے 35  ٹکڑے کر کے فریج میں رکھ دیے تھے۔

ملزم نے شردھا کی لاش کے ٹکڑے 18 دن میں مختلف مقامات پر پھینکے تھے۔