ماسکو کے شاپنگ سینٹر’میگا کھمکی‘ میں بڑے پیمانے پر آگ لگ گئی ہے جس میں جھلس کر ایک سیکیورٹی گارڈ ہلاک ہوگیا ہے۔

غیر ملکی خبر رساں ادارے کی رپورٹ کے مطابق روس کے دارالحکومت ماسکو کے شاپنگ سینٹر ’میگا کھمکی‘ میں آگ لگ گئی ہے جب کہ شاپنگ سینٹر بری طرح  آگ کی لپیٹ میں آگیا ہے۔

روسی حکام کا کہنا ہے کہ فائرفائٹرز آگ بجھانے میں مصروف ہیں،141 فائرفائٹرز اور 47 فائر انجن آگ بجھانے میں مصروف ہیں۔

روسی حکام کے مطابق آگ سے جھلس کر ایک سیکیورٹی گارڈ ہلاک ہوگیا ہے جب کہ سات ہزار اسکوائر میٹر پر پھیلے شاپنگ مال کی عمارت تاحال جل رہی ہے۔

روسی حکام کو شبہ ہے کہ بڑے پیمانے پرآگ لگائی گئی ہے، بجھنے کے بعد آگ لگنے کی وجوہات کی تفتیش کی جائے گی۔

حکام کا کہنا ہے کہ عمارت کے ڈیزائن کی وجہ سے کام میں رکاوٹ پیدا ہورہی ہے جب کہ چھت گرنے کی وجہ سے آگ فوری طور پر ایک بڑے علاقے میں پھیلی۔

ایمرجنسی سروسز ایجنسی کے سربراہ کا کہنا ہے کہ آگ لگنے کی وجہ عمارت میں مرمت کے کام کے دوران حفاظتی ضوابط کی خلاف ورزی کا نتیجہ لگتی ہے۔

غیر ملکی خبر رساں ادارے سے گفتگو کرتے ہوئے ایک کارکن نے بتایا کہ شارٹ سرکٹ کی وجہ سے آگ لگی، اس کے بعد ایک دھماکہ ہوا جس کی وجہ سے آگ کے شعلے پھیل گئے۔

The "Mega Khimki" shopping center in #Moscow is on fire. The fire area is about 7000 m². pic.twitter.com/GXxKB3vbxs

— NEXTA (@nexta_tv) December 9, 2022

سوشل میڈیا پر وائرل ہونے والی ویڈیوز میں ایک بہت بڑی آگ دیکھی گئی ہے جب کہ لوگ جلتی ہوئی عمارت سے بھاگ کر پارکنگ میں جا رہے ہیں۔