امریکی محکمہ خارجہ کے ترجمان میتھیو ملر کا کہنا ہے کہ  پاکستان امریکا کا ایک بڑا نان نیٹو اتحادی اور نیٹو پارٹنر ہے۔

بین الاقوامی خبررساں ادارے کے مطابق   واشنگٹن میں پریس کانفرنس کے دوران ترجمان امریکی محکمہ خارجہ میتھیو ملر  نے پاکستان مین دہشت گردی میں جاں بحق ہونے والے سیکیورٹی اہلکاروں کے اہل خانہ سے تعزیت کا اظہار کیا۔

آرمی چیف جنرل عاصم منیر کی امریکی وزیر خارجہ انٹونی بلنکن سے ملاقات  کے سوال پر انہوں نے کہا کہ  پاکستانی آرمی چیف واشنگٹن میں کئی عہدیداروں سے ملاقات کے لیے آئے تھے۔

ترجمان امریکی محکمہ خارجہ  کا کہنا تھا کہ پاکستانی آرمی چیف نے اسٹیٹ ڈپارٹمنٹ کے افسران، بشمول پینٹاگون اور دیگر جگہوں کے اہلکاروں سے ملاقاتیں کیں۔

میتھیو ملر نے کہا کہ پاکستان امریکا کا ایک بڑا نان نیٹو اتحادی اور نیٹو پارٹنر ہے۔ پاکستان کے ساتھ علاقائی سلامتی اور دفاعی تعاون پر شراکت  ہے اور ملاقات کا مقصد  بھی یہی تھا۔

انہوں نے کہا کہ   پاکستان میں آزادانہ، منصفانہ انتخابات کی حمایت جاری رکھیں گے۔ آزادانہ اور منصفانہ انتخابات کے لیے  دو طرفہ بنیادوں پر پاکستان کے ساتھ بات چیت جاری ہے۔

ترجمان امریکی محکمہ خارجہ نے مزید کہا کہ ہم پاکستانی سیاسی جماعتوں پر کوئی پوزیشن نہیں لیتے۔ ہم ان تمام سیاسی رہنماؤں کے ساتھ بات چیت کریں گے جنہیں پاکستانی عوام منتخب کرتے ہیں۔