ماہرین صحت نے مقبوضہ کشمیر میں 14 لاکھ سے زائد افراد کے منشیات استعمال کرنے کا انکشاف کیا ہے۔

کشمیر میڈیا سروس کی رپورٹ کے مطابق انسٹی ٹیوٹ آف مینٹل ہیلتھ اینڈ نیورو سائنسز سری نگر نے انکشاف کیا ہے کہ منشیات کی لت میں مبتلا 1560 افراد رواں برس علاج کی غرض سے شہر کے ایک اسپتال کا دورہ کیا۔

انہوں نے کہا ایک اندازے کے مطابق مقبوضہ علاقے میں 14 لاکھ سے زائد افراد منشیات کا استعمال کر رہے ہیں جب کہ 2022 میں اسپتال کا رخ کرنے والوں کی تعداد 3395 تھی۔

صورہ اسپتال سری نگر کے ڈاکٹر عبدالمجید کا کہنا ہے کہ اعداد و شمار سے پتا چلتا ہے کہ منشیات کے استعمال میں بتدریج کمی آرہی ہے لیکن اس حوالے سے ابھی بہت کام کرنا باقی ہے۔

انہوں نے کہا کہ منشیات کے عادی افراد کی ایک بڑی تعداد ٹرانسپورٹ اور طلباء برادری کی ہے۔

واضح رہے کہ مقبوضہ کشمیر میں منشیات کی لعنت اور ذہنی انتشار کا سبب بننے والے کثیر جہتی عوامل میں بھارتی فورسز کی بھاری نفری کی تعیناتی، قابض اہلکاروں کے مظالم، سیاسی غیر یقینی، بے روزگاری اور غریت وغیرہ شامل ہیں۔