بنگلہ دیش کی وزیراعظم شیخ حسینہ واجد استعفیٰ دے کر بھارت پہنچ گئیں۔

بھارتی میڈیا رپورٹس کے مطابق شیخ حسینہ واجد کو بنگلادیش سے بھارت لے جانے والی پرواز میں ان کے ہمراہ ان کی بہن بھی سوار تھیں۔

بھارت نے بنگلا دیش آنے جانے والی تمام پروازیں اور ٹرینیں روک دی ہیں اور بارڈر سیکیورٹی فورس کو کسی بھی ممکنہ صورتحال کے پیشِ نظر ہائی الرٹ کردیا ہے۔

واضح رہے کہ بنگلادیش میں 1971 کی جنگ لڑنے والوں کے بچوں کو سرکاری نوکریوں میں 30 فیصد کوٹہ دیے جانے کے خلاف گزشتہ ماہ کئی روز تک مظاہرے ہوئے تھے جن میں 200 افراد ہلاک ہوئے جس کے بعد سپریم کورٹ نے کوٹہ سسٹم کو ختم کردیا تھا۔

سول نافرمانی کی تحریک چلانے والے طلبہ نے وزیراعظم حسینہ واجد سے استعفے کا مطالبہ کیا تھا اور کرفیو کے باوجود ڈھاکا کی جانب مارچ کا اعلان کیا تھا۔

گزشتہ روز طلبہ کے احتجاج کے دوران ہونے والی جھڑپوں میں اموات کی تعداد 100 سے زائد ہوگئی تھی جبکہ مجموعی طور پر حکومت مخالف احتجاج سے اب تک 300 افراد جان سے ہاتھ دھو بیٹھے۔

آج بنگلادیشی فوج نے وزیراعظم حسینہ واجد کو مستعفی ہونے کے لیے 45 منٹ کی ڈیڈلائن دی تھی، جس کے بعد وہ استعفیٰ دے کر بھارت چلی گئیں جبکہ آرمی چیف نے ملک میں عبوری حکومت بنانے کا اعلان کردیا۔