لبنانی مزاحمتی تنظیم حزب اللہ کا کہنا ہے کہ اسرائیل کو پیجر دھماکوں کا غیرمتوقع جواب دیا جائے گا۔

عرب میڈیا کے مطابق لبنانی مزاحمتی تنظیم حزب اللہ نے پیجر دھماکوں کا ذمہ دار  اسرائیل کو قرار دیتے ہوئے کہا کہ اسرائیل کو ایسا جواب  دیا جائے گا جس کا ممکنہ طور پر اس کواندازہ تک نہ ہوگا۔

ترجمان حزب اللہ کا کہنا ہے کہ پیجرز ڈیوائس میں دھماکےبیٹری پھٹنےسےنہیں  بلکہ بارودی مواد کی وجہ سےہوئےہیں۔ پیجرزڈیوائس امریکی کمپنی کے ہیں، مزید تحقیقات کی جا رہی ہیں۔

لبنان میں پیجردھماکوں میں کم از کم 11 افراد شہید اور ڈھائی ہزارسے زائد زخمی ہوئے  ہیں جن میں سے کئی زخمیوں کی حالت تشویشناک ہے۔

پیجر دھماکوں میں لبنان سمیت شام میں  بھی حزب اللہ کے 7 اراکین شہید ہوئے۔

روسی میڈیا کے مطابق زخمیوں میں لبنان میں تعینات ایرانی سفیرمجتبیٰ امانی بھی شامل ہیں۔ان کی  اہلیہ کا کہنا ہے کہ وہ ٹھیک ہیں۔

 دھماکوں کی لہر پر اسرائیل کی طرف سے فوری طور پر کوئی تبصرہ نہیں کیا گیا  تاہم اسرائیلی میڈیا کا دعویٰ ہے کہ دھماکوں کے پیچھے اسرائیل کا ہاتھ تھا ۔اسرائیلی وزیراعظم  نیتن یاہو نےخصوصی اجلاس کےدوران لبنان میں پیجردھماکوں کی منظوری دی تھی۔

اسرائیلی میڈیا کی رپورٹ میں کہا گیا ہے کہ خصوصی اجلاس میں نیتن یاہو نے سینئروزراءاورانٹیلی جنس سربراہوں سےمشاورت کی تھی۔