کابل ایئرپورٹ پر حملے میں ملوث دہشت گرد کی گرفتاری پر امریکی صدر ڈونلڈ ٹرمپ نے پاکستان سے تشکر کا اظہار کیا ہے۔

 پاکستان نے سی آئی اے انٹیلیجنس کی بنیاد پر سینیئر داعش کمانڈر محمد شریف اللہ کو گرفتار کر لیا، داعش کمانڈر محمد شریف اللہ 2021 میں کابل ایئرپورٹ پر حملے کا ماسٹر مائنڈ تھا۔

صدر ٹرمپ نے امریکی انخلا کے دوران کابل ایئرپورٹ پر حملے کو امریکی تاریخ کا سب سے شرمناک لمحہ قرار دیا۔

 کانگرس کے مشترکہ اجلاس سے خطاب میں صدر ٹرمپ نے داعش کمانڈر کی گرفتاری کا انکشاف کیا اور اس کی گرفتاری میں مدد دینے پر حکومت پاکستان سے اظہار تشکر کیا۔

 کابل ایئرپورٹ پر حملے کے دوران 13 امریکی فوجی مارے گئے تھے، داعش کمانڈر محمد شریف اللہ عرف جعفر کو پاکستانی اداروں کی جانب سے حراست میں لیے جانے کے بعد امریکہ کے حوالے کیا جا رہا ہے۔

امریکی میڈیا کے مطابق داعش کمانڈر محمد شریف اللہ عرف جعفر کو آج امریکہ پہنچایا جائے گا، 26 اگست 2021 کے حملے کے باعث داعش کمانڈر محمد شریف اللہ امریکی انٹیلیجنس کا ہائی ویلیو ٹارگٹ تھا۔

سی آئی اے ڈائریکٹر جان ریٹکلف نے جنوری میں کانگرس کے سامنے تصدیق کی تھی کہ دہشت گرد شریف اللہ کی گرفتاری کو صدر ٹرمپ نے ترجیحات میں شامل کر رکھا ہے۔

 سی آئی اے کی فراہم کردہ معلومات پر پاکستانی ایلیٹ یونٹ نے پاک افغان سردی علاقے سے دہشت گرد کمانڈر شریف اللہ کو گرفتار کیا جبکہ امریکہ کو 10 روز قبل کمانڈر شریف اللہ کی گرفتاری سے آگاہ کر دیا گیا تھا۔

 کمانڈر شریف اللہ کی گرفتاری پاکستان اور ٹرمپ انتظامیہ کے انٹیلیجنس اور انسداد دہشت گردی کے حوالے سے تعاون کا مظہر ہے۔