چین نے مقبوضہ کشمیر کے علاقے پہلگام میں پیش آنے والے افسوسناک واقعے کے بعد پاکستان کی بھرپور حمایت کا اعلان کیا ہے۔ چینی وزیر خارجہ کی جانب سے جاری بیان میں کہا گیا ہے کہ چین پاکستان کے جائز سکیورٹی خدشات کو مکمل طور پر سمجھتا ہے اور پاکستان کی خودمختاری و سلامتی کے تحفظ کی کوششوں کی بھرپور حمایت کرتا ہے۔

بیان میں پہلگام واقعے کی منصفانہ اور بروقت تحقیقات کے مطالبے کا اعادہ کرتے ہوئے کہا گیا کہ ایسے واقعات میں حقائق تک رسائی ناگزیر ہے، تاکہ کشیدگی میں کمی لائی جا سکے۔

چینی وزیر خارجہ نے پاکستان اور بھارت دونوں پر زور دیا کہ وہ صبر و تحمل کا مظاہرہ کریں، اشتعال انگیزی سے گریز کریں اور مسائل کے حل کے لیے بات چیت کا راستہ اپنائیں۔ ان کا کہنا تھا کہ خطے میں امن و استحکام کے لیے مکالمہ ہی واحد مؤثر ذریعہ ہے۔

یاد رہے کہ چند روز قبل مقبوضہ کشمیر کے سیاحتی مقام پہلگام میں نامعلوم مسلح افراد کی فائرنگ سے 26 سیاح ہلاک ہو گئے تھے۔ بھارت نے اس واقعے کا الزام بغیر کسی ثبوت کے پاکستان پر عائد کیا، جس کے بعد سندھ طاس معاہدے کی معطلی سمیت متعدد سخت اقدامات کا اعلان کیا گیا۔

جوابی طور پر پاکستان نے بھی سخت سفارتی مؤقف اپناتے ہوئے بھارت سے ہر قسم کی تجارت معطل کر دی، بھارتی ایئرلائنز کے لیے فضائی حدود بند کر دی، اور بھارتی سفارت کاروں کو ملک چھوڑنے کا حکم جاری کیا۔

پاکستان نے اس واقعے پر عالمی سطح پر غیر جانبدار تحقیقات کی پیشکش کرتے ہوئے مؤثر سفارت کاری کا مظاہرہ کیا۔ نائب وزیر اعظم نے دنیا کے مختلف ممالک کے وزرائے خارجہ سے رابطہ کر کے واقعے کی تفصیلات سے آگاہ کیا اور پاکستان کا مؤقف پیش کیا۔