سابق امریکی صدر ڈونلڈ ٹرمپ ایک بار پھر متنازع بیان دے بیٹھے، انہوں نے پاکستان اور بھارت کے درمیان کشیدگی کی تاریخ سے لاعلمی کا مظاہرہ کرتے ہوئے مسئلہ کشمیر کو “ایک ہزار سال پرانا” قرار دے دیا۔

ایئرفورس ون میں صحافیوں سے گفتگو کے دوران ایک سوال کے جواب میں صدر ٹرمپ نے کہا کہ پاک بھارت کشیدگی کوئی نئی بات نہیں، بلکہ یہ معاملہ صدیوں پرانا ہے۔ ان کے بقول، “پاکستان اور بھارت ایک ہزار سال سے کشمیر پر لڑ رہے ہیں، بلکہ شاید اس سے بھی زیادہ عرصے سے۔”

صدر ٹرمپ نے اس موقع پر یہ بھی کہا کہ وہ دونوں ممالک کے لیڈران کو جانتے ہیں، مگر انہوں نے اس بات سے گریز کیا کہ وہ ان رہنماؤں سے رابطہ کریں گے یا نہیں۔

ان کا مزید کہنا تھا کہ “میں سمجھتا ہوں کہ وہ کسی نہ کسی طریقے سے مسئلہ کا حل نکال لیں گے، کیونکہ یہ صورتحال بہت دیر سے جاری ہے۔”

دلچسپ بات یہ ہے کہ طیارے میں موجود کسی صحافی نے یہ تصحیح نہیں کی کہ مسئلہ کشمیر دراصل 1947 میں تقسیم ہند کے بعد پیدا ہوا، نہ کہ ڈیڑھ ہزار سال قبل۔

واضح رہے کہ حالیہ دنوں بھارت کے زیر انتظام کشمیر کے علاقے پہلگام میں 26 بھارتی سیاحوں کی ہلاکت کے بعد پاک بھارت کشیدگی میں اضافہ ہوا ہے، جبکہ بھارت کی جانب سے سندھ طاس معاہدے کی معطلی جیسے اقدامات نے صورتحال کو مزید سنگین بنا دیا ہے۔