امریکی صدر ڈونلڈ ٹرمپ نے کہا ہے کہ آئندہ 2 سے 3 ہفتوں میں چین کے لیے درآمدی ٹیرف کے حوالے سے اہم فیصلے کیے جائیں گے۔

وائٹ ہاؤس میں میڈیا سے گفتگو کرتے ہوئے صدر ٹرمپ نے کہا، “چین کے ساتھ ہماری ڈیلنگ بہت اچھی ہوگی، اور انہیں معاہدہ کرنا ہی پڑے گا۔ اگر وہ نہ بھی کریں تو ہم خود ڈیل طے کریں گے۔”

امریکی صدر کا کہنا تھا کہ ٹیرف میں نرمی کا دارومدار مکمل طور پر چین کے رویے اور اس کی قیادت کے اقدامات پر ہوگا۔

انہوں نے مزید کہا کہ چین کے ساتھ تجارتی معاہدہ جلد طے پا سکتا ہے اور موجودہ ٹیرف میں نمایاں کمی کی جا سکتی ہے۔

ٹرمپ نے اس موقع پر دیگر ممالک کے حوالے سے بھی اہم بیانات دیے۔ ان کا کہنا تھا کہ کینیڈا سے گاڑیوں کی درآمد پر بھی نظرثانی کی جا رہی ہے اور کینیڈین کاروں پر ٹیرف میں اضافے کا امکان موجود ہے۔

ٹرمپ نے دو ٹوک انداز میں کہا کہ، “ہم کینیڈا کے ساتھ ڈیل پر کام کر رہے ہیں، مگر ہم ان کی کاریں نہیں چاہتے،”

یاد رہے کہ امریکہ نے چینی مصنوعات پر اب تک 145 فیصد تک کے ٹیرف عائد کیے ہیں، جبکہ چین نے بھی جوابی کارروائی میں امریکی مصنوعات پر 125 فیصد ٹیرف لاگو کر رکھے ہیں۔ چین کی وزارت خارجہ کا کہنا ہے کہ وہ امریکہ کے ساتھ تجارتی مذاکرات کے لیے تیار ہے، اور کسی معقول حل تک پہنچنے کی کوشش کی جائے گی۔