امریکی وزیر دفاع پیٹ ہیگستھ نے ان خبروں کو سختی سے مسترد کر دیا ہے جن میں دعویٰ کیا گیا تھا کہ انہوں نے اپنی اہلیہ کے ساتھ حساس فوجی معلومات شیئر کی ہیں۔

یہ الزامات ان پر دوسری بار عائد کیے گئے ہیں کہ انہوں نے کمرشل میسجنگ ایپ سگنل کے ذریعے غیر مجاز افراد سے خفیہ معلومات کا تبادلہ کیا۔

الزامات کے مطابق ہیگستھ نے یمن پر کی جانے والی فضائی کارروائیوں سے متعلق تفصیلات ایک نجی چیٹ گروپ میں شیئر کیں، جس میں ان کی اہلیہ، بھائی اور وکیل شامل تھے۔

وزیر دفاع نے ان الزامات کو من گھڑت قرار دیتے ہوئے کہا کہ یہی میڈیا کا طریقہ ہے۔ وہ ناراض سابق ملازمین کے نامعلوم ذرائع استعمال کرتے ہیں اور لوگوں کی ساکھ تباہ کرنے کی کوشش کرتے ہیں لیکن میرے ساتھ یہ حربہ کامیاب نہیں ہوگا۔

وائٹ ہاؤس نے بھی وزیر دفاع کی حمایت کرتے ہوئے ان کے خلاف جاری تنقید کو مسترد کیا ہے۔ تاہم، پیٹ ہیگستھ کو سابق ساتھیوں کی جانب سے بڑھتی ہوئی مخالفت کا سامنا ہے۔

تین سابق عملے کے ارکان نے ایک مشترکہ بیان میں اپنی برطرفیوں پر شدید ردِعمل ظاہر کیا ہے، جبکہ ان کے سابق پریس سیکریٹری نے ان کی برطرفی کا اشارہ دیا ہے۔