منامہ بحرین میں پاکستان کلب کی لٹریری کمیٹی اوراردو مرکزبحرین کے زیراہتمام ماہ محرم کی مناسبت سے محفل نذرانہ عقیدت کا انعقاد کیا گیا۔
محفل نذرانہ عقیدت میں شعرا نے حمد باری تعالیٰ، نعت رسول مقبول ﷺ، اوراہلبیت رسولﷺ کی شان میں کلام پیش کیا۔ شعرا نے منظوم انداز میں گلہائےعقیدت پیش کیے جنہیں حاضرین نے بے حد سراہا۔
پاکستان کلب کی لٹریری کمیٹی اوراردو مرکزبحرین کے زیراہتمام ماہ محرم کی مناسبت سے محفل نذرانہ عقیدت میں قاری ظہورالٰہی نے تلاوت سے محفل کا آغازکیا۔
کلب کی لٹریری کمیٹی کے زیراہتمام محفل کی صدارت محمد افضل بھٹی (چیئرمین پاکستان کلب) کی نمائندگی کرتے ہوئے وائس چیئرمین پاکستان کلب خرم عباسی نے کی جبکہ معروف شاعر اقبال طارق نے بطور مہمان خصوصی شرکت کی۔
محفل میں معروف نَعت خواں وشعرا، محمد وسیم سلطانی، وقاص علی، وسیم حسن سلطانی، عبدالجبار، حافظ حسن فدا، رانا محمد صفدرمعصومی، شیرازاحمد، اقبال طارق، سعید سعدی، اسد اقبال نے شرکت کی اوراہلبیت رسولﷺ کی شان میں اپنا کلام پیش کیا۔
شعرا نے منظوم اندازمیں گلہائےعقیدت پیش کیے جنہیں حاضرین نے بے حد سراہا۔ نظامت کے فرائض غلام مرتضیٰ نے انجام دیے۔
نعت کمیٹی پاکستان کلب کے کنوینرمحمد ايوب کهوکهر، اردو مرکز بحرین کے ارکان نثاراحمد، شہزاد احمد اور فواد سمیت بڑی تعداد میں عاشقان رسول ﷺ نے شرکت کی۔
محفل کےاختتام پروائس چیئرمین پاکستان کلب خرم عباسی نےشعرا کرام، نَعت خواں، مہمانوں کا شکریہ ادا کیا اور لٹریری کمیٹی کی کارکردگی کو سراہا۔
اس موقع پر خرم عباسی نے کہا کہ ہمارا مقصد حضورﷺ کی طرز زندگی کی تلقین کرنا ہے، جبکہ تمام مسلمانوں کواسلامی اقدار پرعمل پیرا ہوکرآنیوالی زندگی کو بہتر بنانا چاہیے۔
آخرمیں حضوراقدسﷺ کی بارگاہ میں درود وسلام پیش کیا گیا۔
شعرائے کرام کا منتخب کلام :
دل کی گلیاں ہیں سیہ پوش یہ غم کس کاہے
اورہر آنکھ میں جو آج ہے نم کس کا ہے
ذکر کرتا ہوں تورندھ جاتی ہے آوازمری
سوچ گرمیرا نہیں شاہ امم کس کاہے
میرے اندرجو ہے اک کرب کا عالم طارق
یہ ہے مولا کا کرم اور بھرم کس کا ہے
اقبال طارق
شجیعِ کرب و بلا کا حُسینؓ سے پوچھو
شہیدِ راہِ وفا کا حُسینؓ سے پوچھو
وہ اقتدارکی خاطر کبھی لڑے ہی نہیں
سو دینِ حق کی بقا کا حُسینؓ سے پوچھو
کریم ہیں وہ سخی ان کا کل گھرانا ہے
عطا کا جودوسخا کا حُسینؓ سے پوچھو
مصیبتوں میں گھرے ہو، حُسینؓ کو دیکھو
مقام صبرو رضا کا حُسینؓ سے پوچھو
دلوں پہ راج حسینی رہےگا تا بہ ابد
محبِ خلقِ خدا کا حُسینؓ سے پوچھو
سعید سعدی
“غدیرخُم پہ نبیﷺ سے وعدہ وفا کریں گے یہ طے ہوا تھا”
خُدا کے احکام پر دِل و جاں فِدا کریں گے یہ طے ہوا تھا
خُدا کی چاہت نبیﷺ کی چاہت، نبیﷺ کی چاہت علی ؑ کی چاہت
یہ کلمہء حق ہے، کلمہء حق ادا کریں گے یہ طے ہوا تھا
جُدا نہیں ہیں خُدا نبیﷺ سے نبیﷺ علی سےعلی خُدا سے
کبھی جو بھُولیں یہ در نہ ایسی خطا کریں گے یہ طے ہوا تھا
اسد اقبال
