سری لنکا میں گزشتہ دو ہفتوں سے جاری شدید بارشوں، سیلاب اور لینڈ سلائیڈنگ نے بڑے پیمانے پر تباہی مچا دی ہے، جس کے نتیجے میں ہلاکتوں کی تعداد بڑھ کر 31 ہو گئی جبکہ 14 افراد تاحال لاپتہ ہیں۔

مقامی میڈیا کے مطابق ملک کے 17 اضلاع میں 4 ہزار سے زائد افراد شدید متاثر ہوئے ہیں۔

موسمیاتی بدترین صورتحال 17 نومبر سے جاری ہے جس کے باعث نشیبی علاقوں میں سیلابی پانی داخل ہوگیا، سڑکیں بہہ گئیں اور سیکڑوں مکانات کو نقصان پہنچا۔

ریسکیو ٹیمیں شدید متاثرہ علاقوں میں امدادی سرگرمیاں جاری رکھے ہوئے ہیں، تاہم مسلسل بارشیں اور تیز ہوائیں کارروائیوں میں رکاوٹ بن رہی ہیں۔

ڈیزاسٹر مینجمنٹ سینٹر کے مطابق اب تک 10 افراد زخمی بھی ہوئے ہیں، جبکہ بعض علاقوں میں نقل و حمل مکمل طور پر معطل ہے۔

باتیکلووا ضلع میں بارش کا حجم 300 ملی میٹر سے تجاوز کر گیا، جو ایک غیر معمولی مقدار ہے۔

محکمہ موسمیات نے بتایا ہے کہ ملک کے اوپر موجود لو پریشر سسٹم کے باعث مسلسل شدید بارشیں اور طوفانی ہوائیں برس رہی ہیں جس سے مزید لینڈ سلائیڈنگ کا خطرہ بڑھ گیا ہے۔

حکام نے آٹھ اضلاع میں ریڈ الرٹ لینڈ سلائیڈ وارننگ جاری کر دی ہے اور رہائشیوں کو ہدایت کی گئی ہے کہ وہ غیر ضروری سفر سے گریز کریں بلند مقامات پر منتقل رہیں اور فوری انخلا کے لیے تیار رہیں۔

امدادی اداروں نے کہا ہے کہ صورت حال اب بھی نازک ہے اور آنے والے دنوں میں مزید بارشوں کا امکان موجود ہے۔