نیپال کے نئےسو روپے کے کرنسی نوٹ کے اجرا پر بھارت میں کھلبلی کیوں مچ گئی؟ وجہ سامنے آگئی ۔
حکومت نیپال کی جانب سے 100 روپے کا نیا کرنسی نوٹ جاری کیا گیا ہے ۔ لیکن اس نوٹ کے اجرا کے ساتھ ہی بھارت میں کھلبلی مچ گئی۔
مذکورہ نوٹ پر ترمیم شدہ نقشہ ہے جس میں کالاپانی، لیپولیکھ اور لمپیادھورا کو نیپال کی حدود کا حصہ دکھایا گیا ہے۔ یہ وہ علاقے ہیں جنہیں بھارت اپنا علاقہ قرار دیتا ہے۔
نیپال راشٹرا بینک کے مطابق نئے نوٹ میں سیکیورٹی فیچرز کو مزید بہتر بنایا گیا ہے تاکہ اس کی تصدیق اور استعمال زیادہ مؤثر ہو سکے۔
یہ نوٹ سابق گورنر مہا پرساد ادھیکاری کے دستخطوں کے ساتھ جاری کیا گیا ہے جبکہ اس پر درج تاریخ اجرا 2081 بی ایس (2024) ہے۔
گزشتہ برس اکتوبر میں نیپالی سینٹرل بینک نے نئی کرنسی کی طباعت کا کام ایک چینی کمپنی کے سپرد کیا تھا۔
مئی 2024 میں سابق نیپالی وزیراعظم کے پی شرما اوُلی کی زیرِ صدارت کابینہ اجلاس میں اس نوٹ کے ڈیزائن کی منظوری دی گئی تھی۔
بینک کے مطابق متنازع علاقوں والا نقشہ پہلے بھی 100 روپے کے نوٹ پر موجود تھا تاہم حکومت کے فیصلے کے تحت اسے مزید واضح کرتے ہوئے نئے ڈیزائن میں شامل کیا گیا ہے۔
ترجمان کے مطابق نیپال کے تمام کرنسی نوٹوں میں سے صرف 100 روپے کے نوٹ پر ملک کا نقشہ موجود ہوتا ہے۔
واضح رہے کہ مئی 2020 میں کے پی شرما اوُلی کی حکومت نے ایک نیا سیاسی نقشہ جاری کیا تھا جس میں مذکورہ متنازع علاقوں کو نیپالی حدود کے اندر دکھایا گیا تھا جسے بعد میں پارلیمنٹ نے بھی منظور کیا تھا۔