اسلام آباد: صدرِ مملکت آصف علی زرداری کو آسٹریلیا، ماریشس، ڈنمارک اور متحدہ عرب امارات کے نئے تعینات سفیروں نے ایوانِ صدر میں اپنی اسنادِ سفارت پیش کیں۔
اس موقع پر پاک افواج کے چاق و چوبند دستے نے غیر ملکی سفیروں کو گارڈ آف آنر پیش کیا۔
صدرِ مملکت نے سفیروں کو ذمہ داریاں سنبھالنے پر مبارک باد دیتے ہوئے امید ظاہر کی کہ ان کی تعیناتیاں پاکستان اور متعلقہ ممالک کے درمیان دو طرفہ اور کثیرالجہتی تعاون کو مزید مضبوط بنائیں گی۔
صدر آصف علی زرداری نے آسٹریلیا کے ہائی کمشنر سے گفتگو میں تجارت، سرمایہ کاری اور تعلیم کے شعبوں میں تعاون بڑھانے پر زور دیا۔
انہوں نے کہا کہ آسٹریلیا میں مقیم پاکستانی کمیونٹی اور طلبہ دونوں ممالک کے درمیان ایک مضبوط پل کا کردار ادا کر رہے ہیں۔
ماریشس کے ہائی کمشنر سے ملاقات میں تجارت، سرمایہ کاری، زراعت، دفاع اور پارلیمانی روابط میں تعاون بڑھانے پر گفتگو کی گئی۔
صدر زرداری نے کہا کہ پاکستان اور ماریشس کے دیرینہ دوستانہ تعلقات مشترکہ ورثے اور ثقافتی ہم آہنگی کی بنیاد پر قائم ہیں۔
ڈنمارک کی سفیر کے ساتھ ملاقات میں تجارت، زراعت، ڈیری، ٹیکنالوجی اور انفراسٹرکچر کے شعبوں میں تعاون بڑھانے پر بات چیت ہوئی۔
صدر نے پاکستان کے گرین ٹرانزیشن اور موسمیاتی تغیر کے ایجنڈے کے لئے ڈنمارک کی حمایت کو سراہا۔
متحدہ عرب امارات کے سفیر سے ملاقات میں صدر آصف علی زرداری نے دو طرفہ تجارت، سلامتی اور دفاعی تعاون کو مزید مضبوط بنانے پر زور دیا۔
انہوں نے کہا کہ پاکستان اور امارات کے تاریخی تعلقات باہمی اعتماد اور مشترکہ امن و خوشحالی کے جذبے پر قائم ہیں۔
آخر میں صدرِ مملکت نے چاروں سفیروں کے لیے نیک خواہشات کا اظہار کیا اور امید ظاہر کی کہ ان کے سفارتی کردار سے دونوں ممالک کے تعلقات نئے اعتماد اور تعاون کے ساتھ آگے بڑھیں گے۔